قاہرہ : صبح اپنے بیٹے کو جگانے کیلئے جانے والی ماں اس کی لاش دیکھ کر خود بھی اس دنیا سے کُوچ کرگئی، دو جنازے ایک ساتھ اٹھنے پر علاقے میں کہرام مچ گیا۔
غیر ملکی خبر رساں ادارے کے مطابق یہ واقعہ مصری صوبے بنی سیوف میں پیش آیا جہاں حرکت قلب بند ہوجانے پر بیٹے کے انتقال کے بعد والدہ اس کا غم برداشت نہ کر سکی اور خود بھی چل بسی۔
بنی سیوف کے قریے شیخ علی البہلول کے باشندوں نے پہلے نوجوان وکیل اور اس کے کچھ دیر بعد اس کی ماں کو سپرد خاک کیا۔
میڈیا سے گفتگو کرتے ہوئے قریے کے دو رہائشیوں نے بتایا کہ عبدالسلام مرسی کی عمر 35 برس تھی۔ وہ قریے میں اپنے خاندانی گھر آیا ہوا تھا۔ نوجوان وکیل احمد عبدالسلام مرسی کا سوتے ہوئے ہارٹ فیل ہوجانے سے انتقال ہوگیا تھا۔
صبح ماں اسے جگانے کے لیے اس کے کمرے میں گئی اور یہ دیکھ کر کہ اس کے بیٹے کی روح پرواز کر گئی ہے غم سے نڈھال ہو کر بیٹے کے پہلو میں گر کر زندگی کی بازی ہار گئی۔
میڈیکل رپورٹ کے مطابق بیٹے اور ماں دونوں کا کا انتقال ہارٹ فیل ہونے کی وجہ سے ہوا ہے، ماں اور بیٹے کے جنازے میں نہ صرف یہ کہ بستی کے باشندے بلکہ آس پاس کے قریوں کے باشندے بھی شریک تھے، ہر شخص رنج و الم کی تصویر بنا ہوا تھا۔
