لاہور: عدالت عالیہ نے غیر ضروری درخواست دائر کرنے پر ایک شہری کو 5 لاکھ روپے جرمانہ کر دیا۔

تفصیلات کے مطابق لاہور ہائی کورٹ کے جسٹس فیصل زمان خان نے شاہزانہ کاظمی کی درخواست پر تحریری فیصلہ جاری کر دیا۔

درخواست گزار نے مختلف اشیا کی اعشاریہ میں قیمتیں مقرر کرنے کے اقدام کو چیلنج کیا تھا۔

لاہور ہائی کورٹ نے اپنے فیصلے میں کہا ہے کہ درخواست گزار متاثرہ فریق نہیں ہے اور نہ ہی درخواست گزار نے بنیادی حقوق کی خلاف ورزی سے متعلق کچھ بتایا۔

عدالت نے کہا اعشاریہ میں قیمتیں مقرر کرنا حکومتی پالیسی کا حصہ ہے، نیز یہ عوامی مفاد کا معاملہ ہے اور یہ کوئی جادوئی چھڑی نہیں جو ہر کسی کے ہاتھ میں دے دی جائے۔

لاہور ہائی کورٹ نے فیصلے میں اس نکتے کو واضح کیا کہ ایسی غیر ضروری درخواستوں سے ملکی اداروں میں افراتفری پھیل سکتی ہے۔

درخواست کی سماعت کے بعد جج نے کہا عدالت اور دوسرے لوگوں کا وقت ضائع کرنے پر یہ عدالت درخواست گزار کو پانچ لاکھ روپے جرمانہ کرتی ہے۔

عدالت نے مزید کہا کہ اگر درخواست گزار 7 دن میں جرمانے کی رقم ادا نہ کرے تو لینڈ ریونیو کے ذریعے یہ رقم وصول کی جائے۔