اسلام آباد : وفاقی وزیر اطلاعات شبلی فرازکا کہنا ہے کہ وزیر اعظم نے مسلم لیگ ن کا این اے 75 کے 23 پولنگ اسٹیشنزپر دوبارہ الیکشن کا چیلنج قبول کرلیا ہے، انشااللہ ان کو پھر سے ہزیمت اٹھانی پڑے گی۔
تفصیلات کے مطابق وفاقی وزیر اطلاعات شبلی فراز نے میڈیا سے گفتگو کرتے ہوئے کہا ن لیگ نے کہا این اے 75میں 23 حلقے دوبارہ کرائیں، وزیراعظم نے چیلنج قبول کیا کہ 23پولنگ اسٹیشنزپر دوبارہ الیکشن ہو۔
ن لیگ پر تنقید کرتے ہوئے شبلی فراز کا کہنا تھا کہ ان کو دیکھ کر لگتا ہے جیسے چور مچائے شور ، کچھ دیر پہلے یہاں ن لیگ کی ترجمان بول رہی تھیں ، ان کا الیکشن کی شفافیت کے حوالے دہرا معیار کیوں ہے۔
وفاقی وزیر اطلاعات نے کہا کہ پی ٹی آئی وہ جماعت ہے، جس نے الیکٹرانک ووٹنگ کی تجویزدی جبکہ انہوں نے کبھی کوئی الیکشن کو مہذب طریقے سے نہیں لڑا، قوم ان سے پوچھے کیوں آپ کے وکیل اورپارٹیاں اوپن ووٹنگ کی مخالفت کرتی ہیں۔
ان کا مزید کہنا تھا کہ انہوں نے صحیح راستہ دیکھا ہی نہیں اورنہ یہ صحیح راستےپرجانا چاہتے ہیں، ان کی ساری سیاست دھونس ،جھوٹ پر مبنی ہے اور ان کی تربیت دھوکہ، جعلیسازی، فریب پرہے۔
ڈسکہ میں فائرنگ سے جاں بحق افراد کے حوالے سے شبلی فراز نے کہا کہ ڈسکہ میں مرنےوالوں کے لواحقین کا مطالبہ تھا ان کو کٹہرے میں لایاجائے، رانا ثنااللہ اور جاوید لطیف کو امن خراب کرنے کا تجربہ ہے، 2 جانیں ضائع ہوگئیں۔
وفاقی وزیر کا کہنا تھا کہ انہوں نے عوام کے اربوں،کھربوں کھائے، آج لندن کے فلیٹس میں بیٹھےہیں، جس طرح وزیراعظم نے چیلنج کیا انشااللہ ان کو پھر سے ہزیمت اٹھانی پڑے گی، ان کا ووٹ بینک نیچے اور ہماراپنجاب میں اوپر جارہاہے۔
انھوں نے مزید کہا یہ دھاندلی کرتے کرپشن کرتے پھر جھوٹ کی بنیاد پرباتیں کرتے ہیں، یہ موقف بدلتے رہتے ہیں،ہم ان کی طرح پوزیشنزنہیں بدل رہے ، ری پولنگ کا فیصلہ الیکشن کمیشن پاکستان کرے گا جو ہمیں قبول ہوگا۔
شبلی فراز کا کہنا تھا کہ پی ٹی آئی مہذب سیاست کرتی ہے ، نوشہرہ میں بھی ہمارے امیدوارنے اعتراضات جمع کرائے ہیں، اغوا،دھونس کی سیاست جیسے کام ان سے منسوب ہیں،ہماری کوشش ہے کہ الیکشن میں وہ لوگ جیتیں جن کو عوام نے منتخب کیاہو۔
