آئین کے آرٹیکل چھ کے تحت پاکستان کی تاریخ میں غداری کے پہلے مقدمے کی پہلی سماعت کل اسلام آباد میں ہوگی، پرویزمشرف کی پیشی کے موقع پرسیکیورٹی کے انتہائی سخت انتظامات کیے گئے ہیں۔
آئین کے آرٹیکل چھ کے تحت کسی بھی آمرکےخلاف غداری کے پہلے مقدمے کی پہلی سماعت، جسٹس فیصل عرب کی سربراہی میں جسٹس یاورسعیداورجسٹس طاہرہ پرمشتمل تین رکنی بینچ سماعت کرے گا۔
پیشی کے موقع پر پرویز مشرف کی سیکیورٹی کے لیے خصوصی انتظامات کیے گئے ہیں، مقدمے کی سماعت شریعت کورٹ کےبجائے نیشنل لائبریری کے آڈیٹوریم میں ہوگی جس کے اردگرد بڑی تعداد میں پولیس اور رینجرز کے اہلکار تعینات ہوں گے۔
عدالت میں داخلہ خصوصی پاسز کے ذریعے ہوگا، حکومت کی جانب سے اکرم شیخ ایڈووکیٹ کو پراسیکیوٹر مقرر کیا گیا ہے،اکرم شیخ نے پانچ نکاتی استغاثہ گزشتہ ہفتے خصوصی عدالت میں جمع کرایا تھا جس کا جائزہ لینے کے بعد رجسٹرار خصوصی عدالت نے قرار دیا تھا کہ بادی النظر میں جنرل ریٹائرڈ پرویز مشرف کے خلاف الزامات درست معلوم ہوتے ہیں لہذا پرویز مشرف چوبیس دسمبر کو عدالت میں پیش ہوکر اپنے خلاف الزامات کا دفاع کریں۔
پرویز مشرف نے سمن وصول کرنے کے بعد وکلا کی ٹیم تشکیل دے دی ہے، ٹیم میں ڈ اکٹر خالد رانجھا، بیرسٹر سیف اور احمد رضا قصوری نمایاں ہیں۔
