پشاور: وزیر اعلیٰ خیبر پختونخواہ کے معاون خصوصی کامران بنگش کا کہنا ہے کہ پشاور، چارسدہ، مردان، صوابی، نوشہرہ، کوہاٹ، مالا کنڈ، سوات اور لوئر دیر میں کرونا وائرس کیسز رپورٹ ہوئے جس کے بعد اسکول بند کیے جارہے ہیں۔
تفصیلات کے مطابق وزیر اعلیٰ خیبر پختونخواہ کے معاون خصوصی کامران بنگش کا کہنا ہے کہ وزیر اعلیٰ نے جلد از جلد رمضان پیکج کی تیاری کی ہدایت کی ہے، اجلاس میں سب سے زیادہ توجہ تعلیم، صحت اور گڈ گورننس پر رہی۔
معاون خصوصی کا کہنا تھا کہ این ٹی ایس کے ٹیسٹ دوبارہ منعقد کروائے جائیں گے، ٹیسٹ مشاورت کے بعد منعقد کیے جائیں گے۔
انہوں نے کہا کہ 5 فیصد کرونا کیسز پر متاثرہ اضلاع میں اسکولوں کو بند کیا جائے گا، متاثرہ اضلاع میں اسکول بند کیے جا رہے ہیں جو 28 مارچ تک بند رہیں گے۔
معاون خصوصی کا مزید کہنا تھا کہ متاثرہ اضلاع میں پشاور، چارسدہ، مردان، صوابی، نوشہرہ، کوہاٹ، مالا کنڈ، سوات اور لوئر دیر شامل ہیں، 28 مارچ کے بعد صورتحال کا جائزہ لیا جائے گا۔
