گجرات: پنجاب کے شہر گجرات کے ایک علاقے میں ٹائم بم کی اطلاع پر بم ڈسپوزل اسکواڈ کا اہل کار بغیر یونی فارم بم ناکارہ کرنے پہنچ گیا۔
تفصیلات کے مطابق گجرات کے علاقے نیو شادمان کالونی میں ٹائم بم کی اطلاع پر بم ڈسپوزل اسکواڈ جب کارروائی کے لیے پہنچا تو معلوم ہوا کہ ایک پیکٹ کو گھڑی لگا کر بم کی شکل دی گئی تھی۔
بم ڈسپوزل اسکواڈ کے اہل کار اشرف بغیر یونی فارم کے ٹائم بم کو ناکارہ بنانے لگے تو بم جعلی نکلا، سڑک کنارے کھڑی گاڑی میں گھڑی لگا کر ایک پیکٹ کو بم کی شکل دی گئی تھی۔
بم ڈسپوزل اسکواڈ کا کہنا تھا کہ شرپسند عناصر عوام میں خوف پھیلانے کے لیے ایسی کارروائیاں کرتے ہیں۔
جعلی بم جیل چوک سے بادشاہی روڈ کی طرف جاتے ہوئے راستے میں ایک گاڑی میں رکھا گیا تھا، اطلاع ملنے پر ڈی ایس پی حافظ امتیاز سمیت تمام متعلقہ ریسکیو ادارے موقع پر پہنچ گئے تھے۔
سیکورٹی اہل کاروں نے جائے وقوعہ کو گھیرے میں لے کر لوگوں سے خالی کرایا، تاہم کارروائی کے دوران پتا چلا کہ واردات لوگوں میں خوف و ہراس پھیلانے کے لیے کی گئی ہے۔
ایس ایچ او سول لائن میر عباس نے کا کہنا تھا کہ کسی نے ون فائیو پر کال کی تو پولیس نے فوراً ریسپانس کیا، ہو سکتا ہے کسی بچے نے اسے پھینکا تھا یا کسی نے ہمیں چیک کرنے کے لیے ایسا کیا، عوام میں خوف و ہراس پھیلانے والوں کو تلاش کیا جا رہا ہے۔
