اسلام آباد: قومی ٹیم کے سابق کپتان شاہد آفریدی کرکٹ بورڈ اور چیف سلیکٹر پر برس پڑے۔
اے آر وائی نیوز کی رپورٹ کے مطابق سابق کپتان شاہد آفریدی نے تقریب سے خطاب کرتے ہوئے کہا کہ خبریں آرہی ہیں چیف سلیکٹر اور کپتان بابر اعظم کے تعلقات ٹھیک نہیں ہیں، سلیکشن میں سب سے اہم کردار کپتان کا ہوتا ہے کیونکہ اس نے میدان میں ٹیم کھلانا ہوتی ہے، اس پر بہت دباؤ ہوتا ہے، بابر اعظم کو مستقبل میں ساتھ لیکر چلنا ہے تو اسے اختیارات بھی دینا ہوں گے، اس کے ساتھ مل کر کام کرنا ہوگا۔
شاہد آفریدی نے کہا کہ جو بھی دو میچوں میں پرفارم کرتا ہے اس کو ٹیم میں شامل کرلیا جاتا ہے، نسیم شاہ سمیت کئی کھلاڑیوں کو کھلا کر اب ٹیم میں شامل ہی نہیں کیا گیا۔
انہوں نے کہا کہ پی ایس ایل ہمارا برینڈ ہے، اگر پلان بی بنایا ہوتا تو ایک دم ایونٹ کو ختم نہ کرنا پڑتا۔
شاہد آفریدی کا کہنا تھا کہ ہونا تو یہ چاہیے تھا کہ جن کے ٹیسٹ مثبت آئے انہیں قرنطینہ کراتے، تھوڑا وقفہ لیتے پی ایس ایل ملتوی نہ کرتے اور اسے جاری رہنے دیتے،غیر ملکی کھلاڑیوں کو روکتے جو رک جاتا ٹھیک ورنہ باقیوں کو جانے دیتے لیکن پی ایس ایل کو ملتوی نہیں کرنا چاہیے تھا۔
واضح رہے کہ اس سے قبل فاسٹ بولر وہاب ریاض نے بھی دورہ جنوبی افریقہ کے لیے ٹیم میں شامل نہ کیے جانے پر سلیکشن پر تنقید کی تھی۔
