دنیا کا سب سے مہنگا پیزا پہلی بار کرپٹو کرنسی بٹ کوائن کے بدلے فروخت کیا گیا، اس پیزا کی خریداری دس سال قبل کی گئی تھی اور آنے والے وقتوں میں بھی شاید یہ ریکارڈ نہ ٹوٹ سکے۔
غیر ملکی خبر رساں ادارے کے مطابق پروگرامر ’لسزلو ہنیچ‘ نے کرپٹو کرنسی بٹ کوائن کا استعمال کرتے ہوئے دنیا میں پہلی خریداری کی تھی۔ انہوں نے دس برس قبل 600 ملین ڈالر میں تاریخ کا سب سے مہنگا پیزا خریدا۔
ہنیچ نے مئی2010 میں پیزا 10 ہزار بٹ کوئنز میں خریدا تھا، جو کرپٹو کرنسی کی موجودہ مارکیٹ ویلیو کے مطابق 600 ملین امریکی ڈالر کے برابر رقم بنتی ہے۔
پروگرامر نے بتایا کہ انہوں نے سال 2010 میں بٹ کوائن فورم میں اپنے قریبی ساتھی سے دو پاپا جونز کے پیزا کے بدلے دس ہزار ڈیجیٹل کرنسی قبول کرنے کو کہا۔
ان کے مطابق پیزا کی قیمت 30 ڈالر بتائی گئی جبکہ اس وقت ڈیجیٹل کرنسی کی قیمت 0.003 ڈالر سے زیادہ نہیں تھی۔ ہنیچ کے مطابق آج بھی ان کو اتنا مہنگا پیزا خریدنے پر کوئی افسوس نہیں ہے۔
واضح رہے کہ اس وقت کرپٹو کرنسی کے ایک بٹ کوائن کی قیمت 60 ہزار ڈالر سے بڑھ کر تاریخ کی بلند ترین سطح پر پہنچ گئی ہے۔
گزشتہ سال کے آغاز کے بعد سے بٹ کوائن کرنسی نے اربوں ڈالر کی سرمایہ کاری کرتے ہوئے عالمی سطح پر شہرت حاصل کی ہے۔ تازہ ترین واقعہ ٹیسلا کے بانی کا 1.5ارب ڈالر سے زیادہ کو ڈیجیٹل کرنسی بٹ کوائن میں تبدیل کرانا ہے۔
