اسلام آباد: وزارتِ داخلہ نے نوازشریف کی صحت اور علاج کی مکمل معلومات حاصل کرنے کے لیے یورپ کے ایڈیشنل سیکریٹری برائے وزارتِ خارجہ کو خط ارسال کردیا۔
نمائندہ اے آر وائی کے مطابق وزارتِ داخلہ کی جانب سے وزارتِ خارجہ کے ایڈیشنل سیکریٹری برائے یورپ کو ارسال کیے جانے والے خط میں نوازشریف کی صحت، علاج اور موجودہ حالت کے بارے میں معلومات مانگی گئیں ہیں۔
خط میں مطالبہ کیا گیا ہے کہ ہائی کمیشن علاج کی تفصیلات کےحصول کے لیے نوازشریف سے راضی نامے پر دستخط کرائے تاکہ علاج کی تفصیلات حاصل کی جاسکیں۔
خط میں لکھا گیا ہے کہ ’برطانیہ میں نوازشریف کا علاج کرنے والے ڈاکٹرز کے نام اور پتہ حاصل کیا جائے تاکہ اُن سے نوازشریف کی صحت کی موجودہ صورت حال، میڈیکل ٹیسٹ اور اُن کی رپورٹس کے بارے میں آگاہی لی جاسکے‘۔
خط میں مطالبہ کیا گیا ہے کہ ’نوازشریف کے اب تک برطانیہ میں ہونے والے علاج اور بیماری کی مکمل تفصیلات بتائی جائیں جبکہ علاج کی مد میں ہونے والی ادائیگیوں کی تفصیلات دی جائیں‘۔
مزید پڑھیں: نوازشریف کے پاسپورٹ کی تجدید کی درخواست پر کارروائی نہ کی جائے، وزارت خارجہ
وزارت داخلہ کی جانب سے ارسال کیے جانے والے خط میں مطالبہ کیا گیا ہے کہ یورپ کے ایڈیشنل سیکریٹری برائے وزارتِ وزارت خارجہ ڈاکٹرز کے معائنے کی تفصیلات بھی فراہم کریں۔
قبل ازیں وزارتِ داخلہ نے وزارتِ خارجہ پاکستان کو ایک خط ارسال کیا جس میں لکھا گیا ہے کہ نوازشریف مفرور مجرم ہیں ، ان کے پاسپورٹ کی تجدید کی درخواست پر کارروائی نہ کی جائے۔
