اسلام آباد: وفاقی وزیر اسدعمر نے کورونا کی تشویشناک صورتحال کے پیش نظر سخت فیصلوں کا اشارہ دیتے ہوئے کہا اسپتالوں میں گنجائش ختم ہونے کے قریب ہے، پاکستانی فیصلہ کرلیں کہ وباکے خاتمےکی پالیسی پر عمل کرنا ہے۔
تفصیلات کے مطابق نیشنل کمانڈ اینڈ آپریشن سینٹر کے سربراہ اسد عمر نے اجلاس کے بعد پریس کانفرنس کرتے ہوئے کہا ہمیں نظرآرہاتھاکہ وباکےپھیلاؤمیں اضافہ ہوگا، وبا کے پھیلاؤ سے متعلق ہی فیصلے کیے گئے، پھران کا جائزہ لیا۔
اسد عمر کا کہنا تھا کہ ہمیں وبا کا پھیلاؤ تیزی سے بڑھتا نظر آیا لیکن فیصلوں پرعملدرآمد نہیں کیا گیا، ہمارے لوگوں کو اندازہ نہیں کہ کتنی خطرناک صورتحال کا سامناہے۔
وفاقی وزیر نے کہا کہ کوروناکی نئی اقسام تیزی سےپھیلتی ہیں اورزیادہ مہلک ہیں، اب بھارت میں روز47ہزارکیس رپورٹ ہورہےہیں، پہلی لہرکے دوران انتہا پر 3300مریض ، دوسری لہرکےدوران انتہاپر2200مریض اور تیسری لہر کے دوران انتہا پر 2800 مریض تشویشناک حالت میں ہیں۔
انھوں نے خبردار کیا کہ شہروں میں ہم اسپتالوں کی گنجائش ختم ہونے کے قریب پہنچ گئےہیں، پاکستانی فیصلہ کرلیں کہ وباکےخاتمےکی پالیسی پرعمل کرنا ہے تو ہم کامیاب ہوں گے۔
اسد عمر کا کہنا تھا کہ پنجاب، آزاد کشمیر، کے پی میں کورونا کی برطانوی قسم تیزی سے پھیل رہی ہے، یہ وقت قوم کی قیادت کرنے کا ہے،اس کو پھیلنے سے روکناہے۔
سربراہ این سی او سی نے مزید کہا انتظامیہ کے ہاتھ مضبوط کیے جانے سے ہی خطرناک صورتحال پر قابو پاسکیں گے ، اگرصورتحال بہترنہ ہوئی تو سخت فیصلےکرنا ہوں گے۔
