ڈھاکہ: بنگلہ دیش میں جاری ٹرائنگولر بلائنڈ کرکٹ سیریز میں پاکستان نے روایتی حریف بھارت کو شکست سے دوچار کردیا ہے۔
تفصیلات کے مطابق ڈھاکہ میں جاری ٹرائنگولر بلائنڈ کرکٹ سیریز میں پاکستان نے بھارت کو 58 رنز سے شکست دے دی ہے، پاکستان بلائنڈ ٹیم نے پہلے بیٹنگ کرتے ہوئے مقررہ بیس اوورز میں 185 رنز بنائے۔
گرین شرٹس کی جانب سے بلے باز بدر منیر نے 27 گیندوں پر 50 رنز بنائے اور ٹیم کے مجموعے کو قابل قدر بنایا، انہوں نے اپنی اننگز میں چار چھکے بھی جڑے، معین اسلم نے 33 اور کپتان نثار علی نے 30 رنز بنائے۔
جواب میں بھارتی بلائنڈ ٹیم قومی بولرز کے وار نہ سہہ سکی اور مقررہ بیس اوورز میں نو وکٹوں کے نقصان پر 127 رنز بناسکی اور یوں قومی بلائنڈ ٹیم نے یہ میچ 58 رنز سے اپنے نام کیا۔
پاکستان تحریک انصاف کے سینیٹر فیصل جاوید نے بنگلہ دیش میں ٹرائنگولر بلائنڈ کرکٹ سیریز میں پاکستان ٹیم کو جیت کی مبارک باد پیش کی ہے، ٹوئٹر پر جاری اپنے بیان میں فیصل جاوید نے کہا کہ بھارت کو شکست دینے پر بلائنڈ ٹیم کو مبارکباد پیش کرتا ہوں، پاکستان نے پہلے بیٹنگ کر کے 185 رنز بنا کر شاندار پرفارم کیا۔
Congratulations to Pakistan upon beating India in tri-nation T20 series in Dhaka. Pak won by 58 runs. Great Performance scoring 185 batting first. Welldone Pakistan!!! @pbcc_official#Triangularblindcricket
— Faisal Javed Khan (@FaisalJavedKhan) April 3, 2021
