برسلز: بیلجیئم پولیس نے 50 کروڑ پیغامات میں اسمگلرز کے خفیہ پیغامات پڑھنے میں کامیابی حاصل کرتے ہوئے ایک بڑی اسمگلنگ ناکام بنا دی۔
غیر ملکی میڈیا کے مطابق یورپی ملک بیلجیئم کی پولیس نے شہر اینٹ ورپ میں اسمگلرز کے ایک دوسرے کو بھیجے گئے خفیہ پیغامات پڑھ کر 28 ٹن کوکین کی اسمگلنگ ناکام بنا کر تمام منشیات ضبط کر لی، جس کی مالیت تقریباً 1.4 ارب ڈالر بنتی ہے۔
شہر کے پراسیکیوٹر کی جانب سے جاری بیان میں کہا گیا وفاقی پولیس نے 2 سال تک منظم جرائم کی تحقیقات کیں اور کینیڈین کمپنی کی فروخت کردہ اسکائی ای سی سی ڈیوائسز کے ذریعے بھیجے گئے 50 کروڑ پیغامات کا جائزہ لیا گیا۔
انھوں نے بتایا کہ 20 فروری سے 27.64 ٹن کوکین اینٹ ورپ کی بندرگارہ پر برامد کی گئی، جس میں سے 11 ٹن جمعے اور ہفتے کی رات کو ایک کنٹینر سے ملی، اس اسمگلنگ کا براہ راست تعلق اسکائی ای سی سی کے کیس سے تھا۔
یاد رہے کہ مذکورہ ڈیوائسز فروخت کرنے والی کمپنی اسکائی گلوبل کے سی ای او اور ایک اہل کار پر امریکا میں مارچ میں منشیات کی اسمگلنگ میں مدد دینے کے مبینہ الزام میں فرد جرم بھی عائد کی جا چکی ہے۔
بیلجیئم میں دو سالہ تحقیقات میں 48 افراد گرفتار کیے جا چکے ہیں، اس تحقیقات کا دائرہ فرانس سمیت کئی ممالک تک پھیلا گیا تھا، اور خفیہ پیغامات کے ڈیٹا کی مدد سے 20 فروری سے اب تک درجنوں منشیات اسمگلنگ کی کوششیں ناکام بنائی جا چکی ہیں۔
