کیلیفورنیا : امریکہ میں ایک خاتون نے ایک ایسی ویڈیو شیئر کی جس کو دیکھ کر جادو کا سا گمان ہوتا ہے، ویڈیو میں دیکھا جا سکتا ہے کہ خاتون اپنی گاڑی میں ہواؤں میں اڑ رہی ہے۔
آپ نے اپنے بچپن میں ایسے ٹی وی ڈرامے تو دیکھیں ہوں گے جس میں ایک جن اپنے قالین پر بیٹھ کر فضاؤں میں اڑ رہا ہے اور اس کے آس پاس بادل بھی دکھائی دے رہے ہیں۔
اسی طرح کی ایک ویڈیو سوشل میڈیا پر وائرل ہورہی ہے کہ جس میں ایک خاتون اپنی کار میں بیٹھی ہواؤں میں اڑ رہی ہے اور گاڑی کی کھڑکی سے اڑتے ہوئے بادلوں کا دلکش منظر بھی نظر آرہا ہے۔
کیلیفورنیا کے علاقے سان ڈیاگو کی رہائشی 22سالہ ہیننا کولبی کی اس ویڈیو کو 70لاکھ سے زائد افراد نے پسند کیا، لاکھوں افراد نے اس اڑتی ہوئی کار کو دیکھ کر حیرت کا اظہار کیا اور بہت سے لوگوں نے ہیری پورٹر کی فلم کے ایک منظر سے اس کا موازنہ کیا۔
ویڈیو میں دیکھا جاسکتا ہے کہ لڑکی اپنی گاڑی میں ایسے جا رہی ہے جیسے وہ ہوا میں اڑ رہی ہو اور نیچے سفید بادل بھی ساتھ چل رہے ہوں لیکن حقیقت میں وہ ایسا نہیں ہے۔
بعد میں ہیننا نے انکشاف کیا کہ گاڑی در حقیقت سڑک پر ہی چل رہی تھی تاہم یہ سڑک اتنی بلندی پر واقع ہے کہ اس کے نیچے بادل نمودار ہوئے۔ ویڈیو کے آخر میں جب کیمرا سامنے کی جانب آیا تو سارا معمہ سمجھ میں آجاتا ہے کہ حقیقت آخر ہے کیا۔
