لندن: فاسٹ بولر محمد عباس کا کہنا ہے کہ کوشش ہے کہ فارم کے ساتھ ردھم میں آؤں اور قومی ٹیم میں کم بیک کروں۔
تفصیلات کے مطابق ایک بیان میں فاسٹ بولر محمد عباس نے کہا کہ پاکستان میں ڈومیسٹک کرکٹ نہ ہونے کے باعث کاؤنٹی کرکٹ کا موقع مل رہا ہے، کاؤنٹی کرکٹ میچز میرے لیے بڑی اہمیت رکھتے ہیں، کوشش ہے کہ فارم کے ساتھ ردھم میں آؤں اور ٹیم میں کم بیک کروں۔
محمد عباس نے کہا کہ خوشی ہے کہ سیزن کے آغاز میں ہی مجھے کامیابی ملی، آئندہ میچوں میں بھی میرا یہی ہدف ہے کہ اپنی کارکردگی کو برقرار رکھوں۔
واضح رہے کہ کاؤنٹی کرکٹ میں ہیمپشائر کی نمائندگی کرنے والے محمد عباس نے مڈل ایکس کے خلاف ہونے والے میچ میں شاندار بولنگ کا مظاہرہ کیا اور میچ میں مجموعی طور پر نو وکٹیں حاصل کیں تھیں۔
پاکستان کے فاسٹ بولر محمد عباس نے پہلی اننگز میں چھ وکٹیں لینے کے بعد دوسری اننگز میں بھی تین کھلاڑیوں کو چلتا کیا،قومی ٹیم کے فاسٹ بولر نے مڈل ایکس کے خلاف میچ میں مجموعی طور پر 31 اوورز کرائے، جن میں 6 میڈن اوور رہے، انہوں نے شاندار بولنگ کرتے ہوئے 31 اوورز میں محض 39 رنز دئیے جبکہ دونوں اننگز میں مجموعی طور پر نو کھلاڑیوں کو آؤٹ کیا۔
پہلی اننگز میں مڈل ایکس کے خلاف محمد عباس ڈراؤنا خواب ثابت ہوئے تھے، جہاں انہوں نے 2.5 اوورز یعنی صرف 17 گیندوں پر تین رنز دے کر پانچ کھلاڑیوں کو آؤٹ کیا، جس میں ہیٹ ٹرک بھی شامل تھی جبکہ اس میں ایک میڈان اوور بھی شامل تھا۔
یہ بھی پڑھیں: فاسٹ بولر محمد عباس کی کاؤنٹی کرکٹ میں شاندار کارکردگی
واضح رہے کہ گزشتہ ماہ مارچ میں کاؤنٹی کرکٹ کلب ہیمپشائر نے محمد عباس سے معاہدہ طے کیا تھا، معاہدے کے تحت محمدعباس 7 میچز کیلئے ہیمپشائر کو دستیاب ہوں گے وہ 23 اپریل تک ہیمپشائر کرکٹ کےہمراہ رہیں گے۔
اس سےقبل محمدعباس 2 سال تک لیسٹر شائر کی نمائندگی کرچکے ہیں، پیسر لیسٹر شائر کی جانب سے 2 سیزن میں 19 میچوں کے دوران 79 وکٹیں حاصل کر چکے تھے۔
