کراچی: پاکستان فلم انڈسٹری کی معروف اداکارہ طلعت صدیقی دُنیا سے رخصت ہوگئیں۔ انھیں فلمی صنعت کی ایک پُروقار شخصیت، دھیمے لب و لہجے اور مخصوص آواز کی مالک اداکارہ کے طور پر پہچانا جاتا تھا۔ طلعت صدیقی کے انتقال کی خبر ان کی بھانجی اور معروف گلوکارہ فریحہ پرویز نے اپنے سوشل میڈیا اکاؤنٹ پر دی۔
سینئر اداکارہ کی دو بیٹیاں عارفہ صدیقی اور ناہید صدیقی بھی فن اور شوبزنس کی دنیا سے وابستہ رہی ہیں، عارفہ صدیقی ماضی میں فلم اور ٹیلی ویژن پر اداکارہ اور گلوکارہ کی حیثیت سے کام کرچکی ہیں جب کہ ناہید صدیقی نام ور کتھک ڈانسر ہیں، طلعت صدیقی کی ایک بہن ریحانہ صدیقی بھی کئی فلموں میں معاون اداکارہ کے طور پر کام کرچکی ہیں۔
فریحہ پرویز نے فیس بک پر طلعت صدیقی کے انتقال کی خبر دیتے ہوئے لکھاکہ ’’میری خالہ طلعت صدیقی صاحبہ آج خالقِ حقیقی سے جا ملیں۔ اللہ انہیں جنت الفردوس میں اعلیٰ مقام عطا کرے۔‘‘
اداکارہ طلعت صدیقی نے اپنے کیریئر کا آغاز ریڈیو پاکستان کراچی سے کیا تھا۔ ان کی پہلی فلم ’’ہمیں بھی جینے دو‘‘(1963) تھی جس میں وہ بطور گلوکارہ متعارف ہوئیں جب کہ بطور اداکارہ پہلی فلم ’’میخانہ‘‘(1964) تھی۔ طلعت صدیقی نے 70 کے قریب فلموں میں کام کیا لیکن انھوں نے اس دور کی روایتی ہیروئن کی طرح کوئی کردار نہیں نبھایا۔ طلعت صدیقی کی مشہور فلموں میں ’دل نشین‘، ’حیدر سلطان‘ اور ’کالیا‘ شامل ہیں۔
