لاہور : ڈولفن سکواڈ نے 7 سالہ بچی کے اغوا کی کوشش ناکام بناتے ہوئے اغواکار خاتون کو گرفتار کرلیا ، خاتون بچی کو ورغلا کر ساتھ لے جارہی تھی۔
تفصیلات کے مطابق شاہ کمال ڈولفن سکواڈ نے بروقت کارروائی کرتے ہوئے 7 سالہ بچی کے اغوا کی کوشش ناکام بنادی اور بچی کو اغواکار خاتون سے بازیاب کروالیا، خاتون بچی کو ورغلا کر ساتھ لے جارہی تھی۔
7 سالہ فریحہ مقامی علاقہ کی رہائشی ہے، اہل علاقہ نے بچی کی شناخت کرکے والد عظیم کو موقع پربلوالیا، جس کے بعد بچی کو لواحقین کے حوالے کرکے اغواء کار خاتون کو تفتیش کیلئے تھانہ منتقل کردیا گیا ہے۔
یاد رہے گذشتہ ماہ کے آغاز میں پنجاب کے شہر گوجرانوالہ میں پولیس نے بچوں کو اغوا کرکے فروخت کرنے والے ملزم کو خریداروں سمیت گرفتار کرکے مغوی کو بازیاب کروایا تھا، ملزم بچوں کو اغوا کرکے بے اولاد جوڑوں کو فروخت کرتا تھا۔
پولیس کا کہنا ہے کہ ملزم پانچ سالہ بچے ابوبکر کو 60 ہزار روپے کے عوض گل نیاز نامی خاتون کو فروخت کررہا تھا، پولیس نے کارروائی کرکے ملزم اور خریدار میاں بیوی کو گرفتار کرلیا۔
