نئی دہلی: کانگریس کے لیڈر نوجوت سنگھ سدھو نے کسانوں سے اظہار یکجہتی کرتے ہوئے گھر پر سیاہ پرچم لہرا دیا۔
بھارتی میڈیا رپورٹس کے مطابق زرعی قوانین کے خلاف جاری کسانوں کی تحریک ایک مرتبہ پھر شدت اختیار کررہی ہے، ایک طرف کسانوں نے مزاحمت کے لیے نئے پروگرام کا اعلان کیا وہیں پنجاب میں کانگریس کے لیڈر نوجوت سنگھ سندھو نے اپنی رہائشگاہ پر سیاہ پرچم لہرا کر کسانوں سے اظہار یکجہتی کیا ہے۔
نوجوت سنگھ سدھو نے ٹویٹر پر ایک ویڈیو شیئر کی جس میں وہ اپنی اہلیہ کے ساتھ گھر کی چھت پر سیاہ پرچم لہرا رہے ہیں۔
سدھو نے ویڈیو میں کہا کہ گزشتہ بیس پچیس سالوں سے کم ہورہی آمدنی اور بڑھتے ہوئے قرض کے سبب کسان پریشان ہیں، یہی وجہ ہے کہ پنجاب کے کسانوں کو تحریک چلانے پر مجبور ہونا پڑا ہے، پنجاب آج ایک ساتھ تین زرعی قوانین کی جنگ لڑ رہا ہے، یہ تینوں قوانین کسان، مزدور اور تاجروں کے حق میں نہیں۔
Hoisting the Black Flag in Protest … Every Punjabi must support the Farmers !! pic.twitter.com/CQEP32O3az
— Navjot Singh Sidhu (@sherryontopp) May 25, 2021
انہوں نے کہا کہ ان قوانین کو واپس نہ لیا گیا تو پنجاب پھر کھڑا نہیں ہو پائے گا، میرے گھر پر سیاہ پرچم لگ گیا ہے، یہ نئے قوانین کے خلاف ہے جب تک قوانین واپس نہیں ہوں گے اس پرچم کو نہیں اتارا جائے گا۔
یاد رہے کہ مودی سرکار کے زرعی قوانین کے خلاف کسان دہلی کے سنگھو، ٹیکری اور غازی پور بارڈر پر نومبر سے سراپا احتجاج ہیں۔
