کوئٹہ : صوبی بلوچستان کے دارلحکومت کوئٹہ سمیت مختلف علاقوں میں زلزلے کے جھٹکے محسوس کئے گئے ،زلزلے کی شدت4.3 اور مرکز افغانستان کا جنوب مشرقی علاقہ تھا۔
تفصیلات کے مطابق کوئٹہ سمیت شمالی بلوچستان کےمختلف علاقوں میں زلزلے کے جھٹکے محسوس کئے گئے ، زلزلہ پیمامرکز کا کہنا ہے کہ زلزلے کی ریکٹراسکیل پر شدت 4.3ریکارڈ کی گئی۔
زلزلہ کا مرکز افغانستان کا جنوب مشرقی علاقہ تھا جبکہ گہرائی 54کلومیٹر تھی۔
زلزلے کے باعث عوام میں شدید خوف وہراس پھیلا اور لوگ کلمہ طیبہ اور استغفار کا ورد کرتے ہوئے اپنے گھروں اور دفاتر سے باہر نکل آئے، فوری طور پر زلزلے سے کسی جانی و مالی نقصان کی اطلاع نہیں ملی ہے۔
یاد رہے رواں سال اپریل میں سوات اور گرد ونواح میں زلزلے کے جھٹکے محسوس کئے گئے تھے، زلزلہ پیما مرکز کے مطابق زلزلے کی شدت 5.4 ریکارڈ کی گئی تھی۔
اس سے قبل فروری میں بھی اسلام آباد، لاہور، راولپنڈی اور پشاور سمیت کئی شہروں میں زلزلے کے جھٹکے محسوس کیے گئے تھے، پاکستان میٹ ڈپارٹمنٹ کے مطابق زلزلے کی شدت 6.4 ریکارڈ کی گئی جبکہ گہرائی 80 کلو میٹر زیر زمین تھی۔
امریکی جیولوجیکل سروے کے مطابق زلزلے کی شدت 5.9 ریکارڈ کی گئی اور زلزلےکا مرکز تاجکستان کے علاقے مرغوب سے 35 کلومیٹر تھا
