اسلام آباد : وزارت صحت کے ذرائع کا کہنا ہے کہ آئندہ ماہ پاکستان کو ویکسین کی 50 لاکھ سے زائد ڈوز ملنے کا امکان ہے، جس میں سائنوویک، سائنوفام، کین سائنوویکسین ، آسٹرازنیکا اور فائزرویکسین شامل ہیں۔
تفصیلات کے مطابق ویکسی نیشن کے عمل میں تیزی کے لئے حکومتی اقدامات جاری ہے، ذرائع کا کہنا ہے کہ آئندہ ماہ کورونا ویکسین کی بھاری مقدار پاکستان پہنچے گی، جون میں پاکستان کو ویکسین کی 50 لاکھ سے زائد ڈوز ملنے کا امکان ہے۔
ذرائع نے بتایا کہ 10روز میں کورونا ویکسین کی 35 لاکھ ڈوزپاکستان پہنچ جائیں گی، اس دوران سائنوویک، سائنوفام، کین سائنوویکسین پاکستان پہنچےگی جبکہ جون میں پاکستان کو کوویکس سے 2 بھاری کھیپ ملنے کا امکان ہے۔
ذرائع کے مطابق جون میں کوویکس پاکستان کو آسٹرازنیکا، فائزرویکسین فراہم کرےگا جبکہ رواں ہفتے چین سے سائینو فارم کی 10لاکھ ڈوزپاکستان پہنچیں گی، چین سے آنے والی کورونا ویکسین کی پاکستان نے خریداری کی ہے۔
ذرائع وزارت صحت نے کہا کوویکس اوائل جون میں آسٹرازنیکا، اختتام پر فائزر فراہم کرے گا، پاکستان کو آسٹرازنیکا کی 12 لاکھ 38 ہزار ڈوز کی دوسری کھیپ ملے گی تاہم کوویکس نے پاکستان کو فائزر ویکسین کی مقدار بارے آگاہ نہیں کیا۔
کوویکس نے ویکسین فراہمی کی حتمی تاریخ سےآگاہ نہیں کیا، فائزر ویکسین کی اسٹوریج، ترسیل کے انتظامات کو حتمی شکل دیدی گئی، فائزر ویکسین کی سٹوریج کیلئے الٹرا کولڈ چین ریفریجریٹرز دستیاب ہیں، جدید ریفریجریٹر منفی 80 سینٹی گریڈ پر ویکسین سٹوریج کے حامل ہیں۔
کوویکس پاکستان کو فائزر ویکسین کی 1 لاکھ ڈوز کی کھیپ فراہم کر چکا ہے جبکہ اب تک پاکستان کورونا ویکسین کی1 کروڑ 16 لاکھ سے زائد ڈوز حاصل کر پایا ہے۔
