ہالی ووڈ اداکارہ کیٹ ونسلیٹ نے سوشل میڈیا پر تصویروں کے ساتھ فلٹرز استعمال کرنے پر افسوس کا اظہار کیا ہے۔
ٹا ئی ٹینک کی مشہور زمانہ ہیروئن کیٹ ونسلیٹ نے ایک انٹرویو کے دوران کہا کہ اصل چہرے خوبصورت ہوتے ہیں لیکن ہم نے سیکھنا چھوڑ دیا ہے کہ ان چہروں سے محبت کیسے کی جائے ؟ کیونکہ اب سوشل میڈیا کی وجہ سے ہم ان چہروں کو فلٹرز کے نیچےچھپا کر رکھتے ہیں۔
آسکر اور بافٹا ایوارڈ یافتہ اداکارہ نے مزید کہا کہ کوئی بھی فوٹوشاپ کے ذریعے خود کو بدل سکتا ہے، عام طور پر مجھے اس نسل کے لئے برا لگتا ہے کیونکہ میں اس چیز کو رکتا یا تبدیل ہوتا ہوا نہیں دیکھ رہی۔
واضح رہے کہ گذشتہ سال نومبر میں ہالی ووڈ اداکارہ کیٹ ونسلیٹ نے سات منٹ تک زیر آب سانس روک کر ٹام کروز کا ریکارڈ توڑا تھا، ذرائع ابلاغ کا کہنا تھا کہ 2015 میں ٹام کروز نے مشن امپاسیبل کی شوٹنگ کے دوران ایک اسٹنٹ کرتے ہوئے پانی اندر 6 منٹ سانس روکنے کا ریکارڈ بنایا تھا جسے پانچ سال بعد کیٹ نے اپنے نام کرلیا۔
کیٹ ونسلیٹ نے یہ ریکارڈ فلم اوتار 2 کی عکسبندی کے دوران اپنے نام کیا جس میں وہ ایک واٹر پرسن کے روپ میں نظر آئیں گی۔
