اسلام آباد: وفاقی وزیر توانائی حماد اظہر نے ایک اہم بیان میں کہا ہے کہ حکومت آئی ایم ایف کا ہدف اپنے طریقے سے حاصل کرنے کی خواہاں ہے۔
تفصیلات کے مطابق اے آر وائی نیوز کے خصوصی بجٹ پروگرام میں گفتگو کرتے ہوئے ہوئے حماد اظہر نے کہا ہم نے آئی ایم ایف کو کہا ہے کہ ہم ہدف اپنے طریقے سے حاصل کرنا چاہتے ہیں۔
انھوں نے بتایا کہ آئی ایم ایف نے ہدف دیا ہے کہ سرکلر ڈیٹ میں اضافے میں کمی لائی جائے، اس ہدف سے متعلق ان سے بات چیت جاری ہے، دراصل بجلی کے مہنگے معاہدوں کی وجہ سے سرکلر ڈیٹ میں اضافہ ہو رہا تھا۔
وفاقی وزیر کا کہنا تھا کہ حکومت کی جانب سے سبسڈیز کو بڑھا کر آئی ایم ایف کا ہدف حاصل کیا جائے گا، انھوں نے کہا ہم بجلی ٹیرف بڑھانے سے متعلق سبسڈی پر زیادہ توجہ دیں گے۔
حماد اظہر کا ملک بھر میں لوڈ شیڈنگ ختم ہونے کا دعویٰ
حماد اظہر نے بتایا کہ آئی ایم ایف کے ساتھ حکومت کی بات چیت چل رہی ہے کہ ہمیں موقع دیا جائے، آئی ایم ایف کو کہا ہے کہ ہم ہدف اپنے طریقے سے حاصل کرنا چاہتے ہیں، آئی ایم ایف کا جو گروتھ ٹارگٹ تھا، ہم نے اس میں پرفارم کیا ہے۔
ان کا کہنا تھا کہ بجلی کی قیمتوں سے متعلق آئی ایم ایف کے ساتھ بات چل رہی ہے، جو دیگر ٹارگٹ تھے اس کو حاصل کر چکے ہیں، ہم نے بجٹ میں براہ راست اور بالواسطہ ٹیکسز کی شرح کو نہیں بڑھایا، ٹیکس بڑھانے کی بجائے ہمیں ٹیکس نظام کو بہتر کرنے کی ضرورت ہے۔
حماد اظہر نے پروگرام میں گزشتہ حکومتوں کے حوالے سے بھی بات کی، انھوں نے کہا کہ گزشتہ حکومتوں کے قرضے ہمارے کھاتے میں نہیں ڈالے جا سکتے، ان قرضوں کی مد میں ہم نے سود واپس کیا، گزشتہ حکومت نے روپے کی قدر کو مصنوعی سہارے پر رکھا، ہم نے اصل قدر پر بحال کیا۔
