آج کلاسیکی موسیقی کے استاد لطافت حسین کی برسی ہے۔ وہ گائیکی کے ساتھ ہارمونیم بجانے میں اختصاص رکھتے تھے۔ استاد لطافت حسین 17 جون 2005ء کو وفات پاگئے تھے۔
کلاسیکی موسیقی میں استاد کا مرتبہ حاصل کرنے والے لطافت حسین کا تعلق شام چوراسی گھرانے سے تھا جو برصغیر میں اس فن کے حوالے سے مشہور رہا ہے اور اس گھرانے نے پاکستان کو وہ نام دیے جو سُر اور ساز کی دنیا میں معروف ہوئے اور اپنے وطن کی پہچان بنے۔ استاد لطافت حسین فنِ موسیقی میں نام ور استاد سلامت علی خان کے فرزند اور استاد نزاکت علی خان کے بھتیجے تھے۔
ان کا خاندان خیال، دھرپد اور کلاسیکی موسیقی کے حوالے سے برصغیر میں معروف ہے۔ استاد لطافت حسین خان گائیکی کے علاوہ ہارمونیم، سرمنڈل اور تانپورہ بجانے میں اختصاص رکھتے تھے۔
استاد لطافت حسین کے بھائیوں میں شرافت علی خان، سخاوت علی خان اور شفقت علی خان بھی کلاسیکی گائیکی کے حوالے سے نام و پہچان رکھتے ہیں اور مقبول گلوکار رفاقت علی خان بھی ان کے عزیز ہیں۔
