پاکستانی شوبز انڈسٹری کے معروف اداکار فیروز خان نے بیروز گاری کے باعث جوس بیچنے والے ایروناٹیکل انجینئر عبدالملک کو ملازمت کی پیش کش کردی۔
‘محبت کا شربت’ کے نام سے تربوز کا جوس بیچنے والے ایروناٹیکل انجینئر کی ویڈیوز انٹرنیٹ پر وائرل ہوئیں تو پاکستان کی ڈرامہ و فلم انڈسٹری کے مشہور اداکار فیروز خان مدد کےلیے میدان میں آگئے۔
چینی یونیورسٹی سے ایروناٹیکل انجینئرنگ کی تعلیم حاصل کرکے بہترین مستقبل کا خواب آنکھوں میں سجھائے واپس پاکستان لوٹنے والے نوجوان عبدالملک اعلیٰ تعلیم یافتہ ہونے کے باوجود ملازمت حاصل کرنے میں ناکام رہے۔
ذرائع کا کہنا ہے کہ مذکورہ نوجوان نے ابتدائی تعلیم بھی متحدہ عرب امارات سے حاصل کی لیکن انہیں قابلیت کے اعتبار سے نوکری نہ ملی، جس کے بعد انہوں نے مجبوراً کراچی کی ایک سڑک پر تربوز کا جوس فروخت کرنا شروع کردیا۔
خبر سوشل میڈیا پر وائرل ہوئی تو اداکار فیروز خان نے انسانی ہمدردی کا مظاہرہ کرتے ہوئے عبدالملک کو ملازمت کی پیش کش کرڈالی۔
فیروز خان نے سماجی رابطے کی ویب سائٹ پر لکھا کہ اگر کوئی شخص میرا عبدالملک سے رابطہ کروا دے تو میں انہیں ملازمت دینا چاہتا ہوں۔
