نئی دہلی : بھارت میں سفاک بیٹوں نے اپنی 80 سالہ ماں کے ساتھ وہ ظالمانہ سلوک کیا کہ جسے دیکھ کر انسانیت بھی شرمندہ ہوگئی،
ماں باپ اپنے بچوں کو پالنے اور ان کو بڑا کرنے میں کتنی جستجو کرتے ہیں تاہم یہی بچے جب بڑے ہو جاتے ہیں تو وہ ماں باپ کی قدر نہیں کرتے۔ کئی ایسی اولادیں بھی ہوتی ہیں، جن کو اپنے ضعیف والدین کی کوئی فکر نہیں ہوتی جو ان کو بوجھ سمجھتے ہیں۔
ایک ایسا ہی دل دہلا دینے والا واقعہ بھارتی ریاست تلنگانہ کے وقارآباد ضلع میں پیش آیا ہے جہاں سنگدل تین بیٹوں نے اپنی 80سالہ ضعیف ماں کو بے یارو مددگار سڑک پر چھوڑ دیا اور وہاں سے چلے گئے۔
بھارتی میڈیا کی رپورٹ کے مطابق یہ ناکارہ بیٹے اپنی ماں کو بوجھ سمجھتے تھے تاہم ان کی پیدائش سے لے کر ان کو بڑا کرنے تک ماں کی محنت کو وہ فراموش کر گئے
یہ ضعیف خاتون دو دن تک بھوکی رہی، جس کے نتیجہ میں وہ بے ہوش ہوگئی۔ اس ضعیف خاتون کی پریشان کن حالت دیکھ کر کوڑنگل بلدیہ کے صدر نشین جگدیشور ریڈی نے کہا کہ اس خاتون کو جلد ہی محفوظ مقام پر منتقل کیا جائے گا۔
