اسلام آباد: سینیٹ اورقومی اسمبلی میں اراکین جمہوریت کے استحکام کے لئے متحرک ہوگئے، قومی اسمبلی میں آئین کی بالادستی کے لئے متفقہ طور پر قرداد منظور کر لی، دونوں ایوانوں کےاجلاس میں سیاسی صورتحال پر بحث کے دوران اراکین نے جمہوری اداروں کی بالادستی کا عزم کیا۔
سیاسی صورتحال کی نزاکت کے پیش نظر سینٹ اور قومی اسمبلی میں ایجنڈے کی کاروائی کو موخر کرکے سیاسی صورتحال پر بحث کی گئی، قومی اسمبلی میں آئین کی بالادستی کے لئے متفقہ طور پر قرداد منظور کر لی گئی جبکہ سینٹ کے اجلاس میں قائد ایوان اور حکومتی اراکین کی غیرموجودگی پر اپوزیشن نے واک آوٹ کیا ۔
ایوان بالا کے اراکین کا اجلاس کے دوران عمومی خیال تھا کہ جمہوریت کی مضبوطی اور ملک کی خوشحالی کے لئے حکومت اور مخالفین آپس کے تنازعات کو بات چیت سے حل کریں، قومی اسمبلی اجلاس کے دوران محمود خان اچکزئی نے کہا کہ پارلیمنٹ اور آئین کو چھیڑنے والوں کے خلاف کھلی جنگ کریں گے ۔
پارلیمانی امور کے وزیر شیخ آفتاب احمد نے کہا کہ جمہوری قوتیں سازشیوں کو کامیاب نہیں ہونے دیں گی، جماعت اسلامی کے رکن اسمبلی شیر اکبر کا کہنا تھا کہ ہرحکومت کو اپنی مدت پوری کرنی چاہیئے۔
