ممبئی : معروف بھارتی اداکار نصیرالدین شاہ کی طبیعت ناسازہوگئی، انہیں فوری طور پر گھر سے اسپتال منتقل کردیا گیا، جہاں ان کی حالت خطرے سے باہر بتائی جارہی ہے۔
بھارتی میڈیا رپورٹس کے مطابق بالی ووڈ کے معروف اداکار نصیرالدین شاہ کی طبیعت اچانک ناساز ہوگئی جنہیں فوری طور پر ممبئی کے ایک اسپتال میں لے جایا گیا جہاں انہیں داخل کرلیا گیا۔
نصیرالدین شاہ کے مینیجر نے میڈیا کو بتایا کہ نصیرالدین شاہ کو نمونیا ہوا ہے اور دوران علاج ان کے پھیپھڑوں پر ایک نشان پایا گیا ہے جس کے بعد وہ ڈاکٹروں کی نگرانی میں ہیں۔ مینیجر کا مزید کہنا تھا کہ اسپتال انتظامیہ نے کچھ روز مزید اسپتال میں رکھنے کا کہا ہے۔
منیجر کے مطابق نصیرالدین شاہ کی طبیعت اب بہتر ہے اور وہ اب بات چیت کرنے کے قابل بھی ہیں۔ ان کی اہلیہ رتنا پاٹھک شاہ اور ان کے بچے بھی اسپتال میں نصیرالدین شاہ کے ہمراہ موجود ہیں۔
نصیر الدین شاہ کی اہلیہ کا میڈیا سے گفتگو کرتے ہوئے کہنا تھا کہ نصیر الدین شاہ کی طبیعت پہلے سے بہتر ہے اور جلد ہی اسپتال سے ڈسچارج کردیا جائے گا۔
