اسلام آباد: پاکستان نے بھارتی الزامات مسترد کرتے ہوئے انہیں افسوسناک قرار دیا اور کہا ہے کہ مسائل کے حل کے لئے الزامات سے گریز کرتے ہوئے مذاکرات کرنا چاہئیں۔
دفتر خارجہ کی ترجمان تسنیم اسلم نے کہا کہ پاکستان بھارتی وزیراعظم نریندرمودی کی جانب سے لگائے دہشت گردی کے الزامات کو مسترد کرتا ہے۔
انہوں نے کہا کہ دونوں ملکوں کو مسائل کا حل مذاکرات کے ذریعے نکالنا چاہئیے، قیام امن اور تعلقات کی بحالی کے لئے الزامات سے گریز کرتے ہوئے دونوں ملکوں کو مل کرکام کرنا ہوگا۔
ترجمان دفترخارجہ کا مزید کہنا تھا کہ ہمسایہ ملک سے خوشگوار تعلقات چاہتے ہیں، پاکستان دہشت گردی کی ہرصورت میں مذمت کرتا ہے۔ دہشت گردی کے خلاف جنگ میں پاکستان کے پانچ ہزارسے زائد فوجیوں نے جام شہادت نوش کی۔
