برطانیہ میں ایک انوکھا ترین اور خوبصورت گھر فروخت کے لیے پیش کردیا گیا، گھر کی خاص بات یہ ہے کہ یہاں کبھی ریلوے اسٹیشن ہوا کرتا تھا۔
برطانیہ میں ایک پرانا ریلوے اسٹیشن جو اب غیر فعال ہوچکا ہے، گھر میں تبدیل کردیا گیا۔ اسٹیشن کے ارد گرد کی زمین کو گارڈن قرار دے کر اسے نجی ملکیت بنا دیا گیا جو دیکھنے میں نہایت خوبصورت ہے۔
3 بیڈرومز کا یہ گھر ساڑھے 5 لاکھ پاؤنڈز میں فروخت کے لیے پیش کیا گیا ہے۔
اسٹیشن ہالٹ نامی یہ اسٹیشن سنہ 1885 میں تعمیر کیا گیا تھا، سنہ 1923 تک یہاں پر عملہ موجود تھا لیکن اس کے بعد یہاں سے تمام عملہ ہٹا دیا گیا اور ٹرینیں بغیر عملے کے یہاں پر رکتی رہیں۔
40 سال بعد اس اسٹیشن کو مکمل طور پر بند کردیا گیا۔
اس اسٹیشن کا محل وقوع نہایت شاندار ہے، سبزے سے گھرا ہوا لکڑی کا گھر جو کبھی ٹکٹ آفس ہوا کرتا تھا لوگوں کو بہت لبھا رہا ہے۔ اس کی رینوویشن بھی کی گئی ہے جس کے بعد ٹرین کا ایک خالی ڈبہ بھی یہاں کھڑا کردیا گیا ہے جبکہ تالاب بھی بنایا گیا ہے۔
یہ گھر سڑکوں اورٹریفک کے شور سے بہت دور ہے اور یہاں تک صرف پیدل سفر کر کے ہی پہنچا جاسکتا ہے۔
