کراچی: اسٹیٹ بینک آف پاکستان (ایس بی پی) نے زرمبادلہ کے ذخائر کی رپورٹ جاری کردی۔
اے آر وائی نیوز کی رپورٹ کے مطابق پندرہ جولائی بروز جمعرات اسٹیٹ بینک آف پاکستان کی جانب سے زرمبادلہ کے ذخائر کی رپورٹ جاری کی گئی، جس میں 09 جولائی تک کے اعداد و شمار شامل کیے گئے ہیں۔
ترجمان اسٹیٹ بینک کے مطابق ایک ہفتے کے دوران مرکزی بینک کےذخائر میں 2 کروڑ 60 لاکھ ڈالرزکمی ہوئی جس کے بعد ذخائر 17 ارب 20 کروڑ ڈالرز تک پہنچ گئے۔
اسٹیٹ بینک کے مطابق کمرشل بینکوں کےذخائرکم ہوکر 7.10ارب ڈالر تک پہنچ گئے۔
مرکزی بینک اور کمرشل بینکوں کے ذخائر کم ہونے کے بعد ملک کے مجموعی ذخائر 10.2 کروڑ سے کم ہوکر 24.31 ارب ڈالرز تک پہنچ گئے۔
واضح رہے کہ 17 جون کو ایس بی پی ترجمان نے بتایا تھا کہ گزشتہ ایک ہفتے کے دوران مرکزی بینک کے ذخائر میں 20 لاکھ ڈالرز کا اضافہ ہوا۔ ترجمان کے مطابق اضافے کے بعد مرکزی بینک کے ذخائر کی مالیت 16 ارب 41 کروڑ 73 لاکھ ڈالرز تک پہنچ گئی تھی۔
