لاہور : پنجاب کے دارلحکومت لاہور میں بھارتی ڈیلٹا وائرس کے 12 کیسز سامنے آگئے ، سیکرٹری صحت کا کہنا ہے کہ بھارتی وائرس کی روک تھام کیلئے اقدامات کیے جارہے ہیں۔
تفصیلات کے مطابق محکمہ صحت پنجاب نے لاہور میں بھارتی ڈیلٹا وائرس کے 12 کیسز کی تصدیق کردی ، سیکرٹری صحت نے بتایا کہ 2 روز قبل28 مشتبہ نمونے لیے گئے تھے ، 28 مشتبہ نمونےمیو،سروسز،جناح اسپتال کےمریضوں سے لیے گئے۔
سیکرٹری صحت کا کہنا تھا کہ بھارتی وائرس کی روک تھام کیلئے اقدامات کیےجارہےہیں، بھارتی وائرس کا پھیلاؤ دوسرے وائرس سے 50 فیصد زیادہ ہے۔
خیال رہے پنجاب میں کورونا وائرس کے کیسز میں نمایاں اضافہ ہورہا ہے ، محکمہ صحت کا کہنا ہے کہ صرف ویکسینیشن ہی کورونا اور اس کی نئی قسم (ڈیلٹا) ویرینٹ کے خلاف واحد اور موثر علاج ہے۔
محکمہ صحت کے مطابق گزشتہ 24 گھنٹوں کے دوران صوبہ بھر سے 415 نئے کیسز رپورٹ ہوئے ، جس کے بعد پنجاب بھر میں کرونا کے کیسز کی ٹوٹل تعداد 349,890 ہو گئی۔
گزشتہ روز صوبہ بھر کے تمام شہروں میں کرونا کی مجموعی مثبت شرح 2.3 ریکارڈ کی گئی، صوبائی دارالحکومت لاہور میں مثبت شرح 3.6، فیصل آباد میں2.0، بہاولپور میں 1.1 اور ملتان میں 1.4 ریکارڈ کی گئی۔
واضح رہے پاکستان میں کورونا کی چوتھی لہرمیں شدت آنے لگی ہے اور ملک میں کورونا مثبت کیسزکی شرح ساڑھے پانچ فیصد سے زیادہ رہی۔
چوبیس گھنٹے میں کورونا کے دوہزارسات سوتراسی مثبت آئے اور مزید انتالیس مریض انتقال کرگئے۔
