بہاولپور: پنجاب کے ضلع بہاولپور میں اولمپئن سمیع اللہ خان کے مجسمے کو دوبارہ اصل حالت میں بحال کردیا گیا۔
عالمی شہرت یافتہ اولمپیئن سمیع اللہ خان کے نصب مجسمے سے ہاکی اور گیند چرانے کا معاملہ سماجی رابطے کی ویب سائٹ پر سامنے آیا، جس پر صارفین نے شدید غم و غصے کا اظہار کیا۔
اولمپیئن کا مجسمہ ایک ماہ قبل بہاولپور کے علاقے ماڈل ٹاؤن میں نصب کیا گیا تھا، ضلعی پولیس کے مطابق مجسمے کی گیند دو روز قبل چوری ہوئی جبکہ گزشتہ رات ہاکی کو بھی غائب کردیا گیا تھا۔
مجسمے سے ہاکی اور بال چوری کیے جانے کی اطلاع پر سماجی رابطوں کی ویب سائٹس پر صارفین شدید غم و غصے کا اظہار کیا اور متعلقہ حکام سے ایسے عناصر کے خلاف سخت کارروائی اور اسے دوبارہ اصل حالت میں بحال کرنے کا مطالبہ کیا۔
سوشل میڈیا صارفین نے سوال کیا کہ بحیثیت قوم ہماری منزل کی سمت کیا ہے؟ ہم کس طرف جارہے ہیں؟۔
اولمپیئن سمیع اللہ کہتے ہیں جن حضرات نے مجسمہ کیساتھ جڑی ہاکی اور گیند غائب کی ہے وہ واپس کردیں..#Pakistan #hockey #Respect pic.twitter.com/iKpUB14yYT
— Ali Hasan (@AaliHasan10) July 18, 2021
سماجی رابطے کی ویب سائٹ پر معاملہ اجاگر ہونے کے بعد ایک شہری نے درخواست جمع کرائی، جس پر پولیس نے مقدمہ درج کر کے کارروائی کا آغاز کیا اور ملزم کی گرفتاری کے لیے چھاپے مارنے کا آغاز کردیا۔
ڈی پی او کے مطابق چوری کا مقدمہ درج کرنے کے بعد مجسمےکو اصل حالت میں بحال کردیاگیا۔ انہوں نے یقین دہانی کرائی کہ واقعے میں ملوث عناصر کو جلد گرفتار کر کے قانون کے کٹھہرے میں لایا جائے گا۔
سمیع اللہ خان کا سفر زندگی
پاکستان کے نامور ہاکی کھلاڑی سمیع اللہ 6 ستمبر 1951 کو بہاولپور میں پیدا ہوئے، انہوں نے 1976 کے مانٹریال اولمپکس سے 1982 تک منعقد ہونے والے عالمی ہاکی ٹورنامنٹس کے متعدد مقابلوں میں پاکستان کی نمائندگی کی۔
کیا ہم ہاکی اولمپئین اور لیجنڈری کھلاڑی سمیع اللہ کے مجسمے ساتھ انصاف کررہے ہیں… بہاولپور میں جو مجسمہ نصب کیا گیا گیند اور ہاکی غائب کردی گئی.#Respect #olympian #Pakistan pic.twitter.com/eK1sijY9JI
— Ali Hasan (@AaliHasan10) July 18, 2021
سمیع اللہ کو برق رفتاری کی وجہ سے دنیائے ہاکی میں انہیں فلائنگ ہارس کا نام بھی ملا، جو اُن کی پہچان بن گیا تھا۔ ان کے بھائی کلیم اللہ خان نے بھی قومی ہاکی ٹیم میں ملک کی نمائندگی کی اوربے پناہ شہرت حاصل کی۔
سمیع اللہ خان کو 14 اگست 1983 کو حکومت پاکستان کی جانب سے صدارتی تمغہ برائے حسن کارکردگی سے نوازا گیا تھا۔
الحَمْدُ ِلله پی ٹی آٸی ورکرز کی طرف سے نیو ہاکی اور گیند لگا دی گٸ ہے۔ https://t.co/eNY9j6AcPH pic.twitter.com/YzkvZbdp9t
— Mubashir🔰 (@MubashirBal0uch) July 18, 2021
