کراچی : واٹر بورڈ اور پولیس نے پانی چوروں کے خلاف کامیاب کریک ڈاؤن کرتے ہوئے غیرقانونی ہائیڈرنٹ کو مسمار کرکے سارا سامان ضبط کرلیا اور 2 ملزمان کو حراست میں لے لیا گیا۔
اس حوالے سے ذرائع کا کہنا ہے کہ وزیر بلدیات سندھ سید ناصر حسین شاہ کی ہدایت پر کراچی واٹر اینٹی ٹھیفٹ سیل نے پانی چوروں کے خلاف سخت ایکشن لیتے ہوئے کارروائی کی۔
کراچی واٹر اینٹی ٹھیفٹ سیل کے عملے نے ملیر ندی انور بلوچ ہوٹل کے قریب قائم غیرقانونی ہائیڈرنٹ کو مسمار کردیا اور جائے وقوعہ سے دو ملزمان کو گرفتار کرکے لاک اپ کردیا۔
کارروائی کے موقع پر کسی بھی ناخوشگوار صورتحال سے نمٹنے کیلئے پولیس کی نفری بھی موجود تھی، تاہم دوران کارروائی کوئی مشکلات درپیش نہیں آئیں۔
میڈیا کو صورتحال سے آگاہ کرتے ہوئے انچارج اینٹی تھیفٹ سیل راشد صدیقی نے بتایا کہ کارروائی کے دوران غیرقانونی ہائیڈرنٹ پر موجود موٹریں، پائپ اور سیکشن پمپ ضبط کرلیے گئے ہیں۔
انہوں نے بتایا کہ غیرقانونی ہائیڈرنٹ سے اطراف کی آبادی کو مہنگے داموں پانی بیچا جاتا تھا اس کے علاوہ غیر قانونی ہائیڈرنٹ کے مالک کے خلاف باقاعدہ ایف آئی آر درج کرائی جائے گی۔
راشد صدیقی کے مطابق کارروائی کے دوران علاقہ کے ایگزیکٹو انجینئر عرفان خان اور اینٹی تھیفٹ سیل کا عملہ اور پولیس اہلکار بھی موجود تھے، انہوں نے کہا کہ پانی مافیا کے خلاف کارروائیاں جاری رہیں گی۔
