لاڑکانہ: اے آر وائی نیوز کے خبر پر ایکشن، تین ماہ قبل دوران آپریشن مریض کے پیٹ میں رہ جانے والی قینچی کو نکال دیا گیا۔
تفصیلات کے مطابق لاڑکانہ کے نواحی علاقے نائچ کے رہائشی غلام شبیر کا تین ماہ قبل آپریشن کیا گیا، آپریشن کے دوران ڈاکٹرز کی سنگین غلطی کے باعث مریض کے پیٹ میں قینچی رہ گئی تھی۔
اے آر وائی نیوز نے متاثرہ شخص کی اسٹوری آن ایئر کی تو چانڈکا میڈیکل کالج کے ڈاکٹرز نے متاثرہ شخص کا آپریشن کیا اور غلام شبیر کے پیٹ سے قینچی نکالی۔
اطلاعات کے مطابق آپریشن کے بعد مریض کو وارڈ منتقل کردیا گیا ہے، جہاں اس کی حالت تشویشناک بتائی جارہی ہے، ورثا کا کہنا ہے کہ ڈاکٹرز آپریشن کرنےکے بعد چلے گئے، مریض کی حالت سے متعلق کچھ نہیں بتایا۔
واضح رہے کہ گذشتہ روز مریض کے رشتے داروں نے چانڈکا اسپتال انتظامیہ کے خلاف پریس کلب کے سامنے احتجاج کیا تھا، اہل خانہ نے بتایا تھا کہ تین ماہ قبل اسپتال میں مریض کا آپریشن کیا گیا تھا، مریض کے پیٹ میں قینچی چھوڑ کر اوپر سے ٹانکے لگائے گئے تھے۔
مظاہرین کا کہنا تھا کہ آپریشن کے بعد تین ماہ سے مریض پیٹ کے درد میں مبتلا رہا، دوبارہ ایکسرے کے بعد پتا چلا مریض کے پیٹ میں قینچی ہے، اے آر وائی نیوز کی خبر کے نتیجے میں چانڈکا اسپتال انتظامیہ نے دوبارہ مریض کو داخل کیا تھا۔
