حیدرآباد: بھارتی ریاست تلنگانا کے ایک ریلوے اسٹیشن پر خاتون کی جلد بازی نے ایک دل دہلا دینے والے منظر کو جنم دیا، جو اسٹیشن پر لگے سی سی ٹی وی کیمرے میں قید ہو گیا۔
تفصیلات کے مطابق تلنگانا کے شہر سکندر آباد کے ریلوے اسٹیشن پر جمعے کی صبح ایک خاتون نے بھاگ کر چلتی ٹرین میں چڑھنے کی کوشش کی اور وہ بری طرح گر کر ٹرین کے پہیوں کے نیچے آ کر کچلے جانے سے بال بال بچی۔
سی سی ٹی وی فوٹیج میں دیکھا جا سکتا ہے کہ ریلوے اسٹیشن پر ریل گاڑی چل پڑی، پولیس اہل کار حفاظت کے لیے مستعد ہیں، اور ایسے میں برقع اوڑھے ایک خاتون بھاگتی ہوئی آتی ہے اور ٹرین میں چڑھنے کی کوشش کرتی ہے۔
ریلوے پروٹیکشن فورس کے اہل کار، جن کی شناخت بعد میں دنیش سنگھ کے نام سے ہوئی، اور جنھیں حکام کی جانب سے مستعدی اور حاضر دماغی سے خاتون کی جان بچانے پر ایوارڈ بھی دیا گیا، نے خاتون کی رہنمائی کی کہ یہاں سے چڑھیں، اور ساتھ ہی ان پر نگاہ بھی رکھی۔
Timely & Daring #LifeSaving act by RPF staff
Aged woman passenger tried to board moving train at Secuderabad stn fell in the gap btwn coach & platform and was being dangerously dragged. On duty RPF constable Sri.Dinesh Singh acted immediately, pulled lady out & saved her life. pic.twitter.com/Me4z0SA7ZW
— South Central Railway (@SCRailwayIndia) July 31, 2021
لیکن نسیم بیگم نامی خاتون نے نہایت جلد بازی کا مظاہرہ کرتے ہوئے ٹرین کے دروازے میں چھلانگ لگا کر چڑھنے کی کوشش کی اور وہ توازن برقرار نہ رکھ سکیں، اگلے لمحے وہ خوف ناک طور پر چلتی ٹرین اور پلیٹ فارم کے درمیان خالی جگہ میں گر گئیں۔
وہ بلاشبہ آہنی پہیوں کے نیچے آ کر کچلی جاتی لیکن دروازے پر موجود ایک مسافر نے ان کا ہاتھ جلدی سے تھام لیا، اور دوسری طرف سے پولیس اہل کار نے لپک کر انھیں پکڑ لیا، اور انھیں کھینچ کر نیچے گرنے سے بچا لیا۔
