ریاض: سعودی عرب میں کورونا کی صورت حال سے متعلق مسلسل مثبت خبریں سامنے آرہی ہیں، مملکت میں فعال کیسز کی تعداد کم ہوگئی جبکہ صحت یابی کی شرح میں بھی اضافہ ریکارڈ کیا گیا۔
عرب میڈیا کی رپورٹ کے مطابق سعودی محکمہ صحت نے مملکت میں کورونا سے متعلق تازہ اعدادوشمار جاری کردیے جن میں کہا گیا ہے کہ کورونا کے فعال کیسز گھٹ کر صرف 10 ہزار 624 رہ گئے اور مریضوں کی یومیہ صحت یابی کی شرح بھی بڑھ رہی ہے۔ گزشتہ 24 گھنٹوں کے دوران 1063 نئے کیسز رپورٹ ہوئے۔
اعدادوشمار کے تحت سعودی عرب میں نئے کیسز رپورٹ ہونے کے بعد مجموعی طور پر کورونا سے متاثر ہونے والوں کی تعداد 5 لاکھ 27 ہزار 877 ریکارڈ کی گئی جبکہ اموات کی تعداد 8259 ہے۔
محکمہ صحت کا کہنا ہے کہ 5 لاکھ 8 ہزار 994 مریض کورونا کو شکست بھی دے چکے ہیں۔
سعودی شہر مکہ سے سب سے زیادہ نئے کیسز(244 مریض) سامنے آئے۔ دارالحکومت نے بھی 217 مریض رپورٹ کیا۔ اسی طرح مشرقی ریجن میں 152 وبا کا شکار ہوئے، عسیر میں وبا نے 108 افرد کو نشانے پر لیا۔
مملکت میں کورونا کے تشویش ناک صورت حال کا سامنا کرنے والے مریض 1434 ہیں۔
