کراچی: شہر قائد کے علاقے نیوکراچی خمیسو گوٹھ میں فائرنگ سے خاتون سیاسی کارکن جاں بحق ہوگئیں۔
اے آر وائی نیوز کے مطابق کراچی کے علاقے نیوکراچی خمیسو گوٹھ کے قریب فائرنگ کا واقعہ پیش آیا، جس میں ایک خاتون جاں بحق ہوئیں، جن کی شناخت فاطمہ زوجہ مسافر کے نام سے ہوئی۔
پولیس حکام کے مطابق مقتولہ کا تعلق سیاسی جماعت سے تھا، جسے دو موٹرسائیکل سواروں نے نشانہ بنایا اور وہ فائرنگ کر کے باآسانی فرار ہوگئے۔
اہل خانہ کے مطابق فاطمہ کو گھر کے قریب فائرنگ کا نشانہ بنایا گیا، مقتولہ کو فاطمہ عرف وڈیری کے نام سے شہرت حاصل تھی، وہ پاکستان پیپلزپارٹی کے پی ایس 123 کی سابقہ انچارج تھیں۔
پولیس نے مقتولہ کو لاش کو ضابطے کی کارروائی کے لیے اسپتال منتقل کیا، جبکہ جائے وقوعہ سے شواہد اکھٹے کر کے تحقیقات شروع کردیں۔ ایس ایس پی سینٹرل نے واقعے کا نوٹس لے کر نیوکراچی تھانے کے ایس ایچ او سے رپورٹ طلب کی اور ملزمان کو فوری گرفتار کرنے کا حکم بھی جاری کیا۔
