حیدرآباد : بھارت میں ہونے والے ایک دلخراش واقعے نے لوگوں کو خوفزدہ کردیا، آٹومیٹک رولنگ شٹر میں پھنس کر ہلاک ہونے والے بچے نے سب کو رلا دیا۔
بھارتی ریاست تلنگانہ کے شہر حیدرآباد میں واقع ایک شوروم کے آٹومیٹک رولنگ شٹر میں لپٹ جانے سے 10 سالہ لڑکے کی ہلاکت ہوئی ہے۔
بھارتی میڈیا کے مطابق مقامی شوروم کا آٹومیٹک شٹر اچانک اوپر چلا گیا جس کی وجہ سے دوسری منزل پر کھیلنے والا 10 سالہ راجیش نامی بچہ اس کی زد میں آگیا اور شٹر میں لپٹ جانے کے باعث بچے نے موقع پر ہی دم توڑ دیا۔
یہ دلخراش حادثہ گزشتہ روز صبح 7.30 بجے کے قریب پیش آیا رولنگ شٹر میں لپٹ جانے کی وجہ سے راجیش چیخنے لگا آواز سن کر ارجن کمار عمارت کی دوسری منزل پر پہنچا تو اس نے رولنگ شٹر کے درمیان اپنے بیٹے کو لپٹا ہوا دیکھا فوری طور پر اسکو باہرنکالنے کی کوشش کی لیکن اسی دوران راجیش نے باپ کے سامنے دم توڑ دیا۔
ارجن کمار اپنی بیوی اور بچوں کے ساتھ پانچ سال قبل حیدرآباد منتقل ہوا تھا۔ مقامی لوگوں کا الزام ہے کہ اس علاقے میں اکثر شوروم آپریٹرز اور بلڈنگ مالکان کی غفلت کی وجہ سے حادثات رونما ہوتے ہیں۔ اس واقعہ سے قبل اسی عمارت میں کام کرنے والے ایک چوکیدار کی بیٹی بجلی کے حادثے میں بال بال بچ گئی تھی۔
بچے کی ہلاکت کی اطلاع ملنے پر پولیس موقع پر پہنچی اور لاش کو پوسٹ مارٹم کے لئے اسپتال منتقل کردیا اور واقعے کا مقدمہ درج کرتے ہوئے کارروائی کا اغاز کردیا ہے۔
