ریاض : خادمین الحرمین الشریفین سلمان بن عبدالعزیز اور سعودی ولی عہد شہزادہ محمد بن سلمان نے پاکستان کے یوم آزادی پر مبارکباد دیتے ہوئے پاکستانی عوام کے لیے دلی تمناؤں اور نیک خواہشات کا اظہار کیا۔
پاکستان کے یوم آزادی کے موقع پر خادمین الحرمین الشریفین، سعودی ولی عہد کے خصوصی تہنیتی پیغامات ارسال کیے، جس میں صدرمملکت ڈاکٹر عارف علوی اور پاکستانی عوام کو یوم آزادی کی مبارکباد دی۔
خادمین الحرمین الشریفین اور سعودی ولی عہد کی جانب سے پیغام میں پاکستانی عوام کے لیے دلی تمناؤں اورنیک خواہشات کااظہار کیاگیا اور پاکستان کی مستقل ترقی، خوشحالی اور استحکام کیلئے خصوصی دعائیں کی گئیں۔
تہنیتی پیغامات میں پاک سعودی برادرانہ تعلقات مزید مستحکم کرنے اور تعاون میں اضافے کی یقین دہانی کرائی۔
اس کے علاوہ امریکا کے وزیر خارجہ ٹونی بلنکن نے امریکی حکومت اور عوام کی جانب سے پاکستانی حکومت اور عوام کو 74 ویں یوم آزادی پر مبارکباد پیش کرتے ہوئے کہا امریکہ کے پاکستان کے ساتھ 7 دہائیوں سے بہترین تعلقات استوار ہیں اور آئندہ بھی جنوبی ایشیا میں قیام امن، استحکام اور خوشحالی کے لیے دونوں ممالک کے درمیان تعاون جاری رہے گا۔
