کابل : افغان کا ایک اور صوبائی دارالحکومت جلال آباد پر افغان طالبان نے اپنا قبضہ قائم کرلیا۔
غیر ملکی خبر رساں ایجنسی کے مطابق کئی برس سے خانہ جنگی کا شکار افغانستان میں غیر ملکی افواج کا انخلا ہوتے ہی افغان طالبان نے دوبارہ افغانستان پر اپنی حکومت قائم کرنے کےلیے متعدد اضلاع، شہروں و صوبائی دارالحکومتوں پر قبضے شروع کردیئے۔
خبر رساں ایجنسی کا کہنا ہے کہ افغان طالبان نے ایک اور صوبائی دارالحکومت کو اپنے قبضے میں لے لیا، صوبہ ننگرہار کے دارالحکومت جلال آباد پر بھی طالبان نے اپنا کنٹرول قائم کرلیا۔
میڈیا رپورٹس میں بتایا گیا ہے کہ طالبان جلال آباد شہر میں بغیر کسی لڑائی کے داخل ہوئے۔
غیر ملکی خبر رساں ادارے کے مطابق افغانستان کے وفاقی دارالحکومت کابل کے سوا تمام بڑے افغان شہروں پر طالبان کا قبضہ ہوگیا۔
خیال رہے کہ اس سے قبل طالبان نے اشرف غنی کے آبائی صوبے لوگر کے دارالحکومت پل علم پر بھی قبضہ کرلیا تھا۔
افغان میڈیا کا کہنا ہے کہ کابل طالبان کی پہنچ سے صرف چند کلو میٹر دور رہ گیا ہے، طالبان نے اب تک افغانستان کے 34 میں سے 21 صوبائی دارالحکومتوں پر کنٹرول حاصل کرلیا ہے۔
