کابل : افغانستان کے دارلحکومت کابل ایئرپورٹ پر ایک بار پھر فائرنگ سے بھگڈر مچ گئی، جس کے بعد طالبان نے کابل ایئرپورٹ کو عارضی طور پر بند کرنے کا اعلان کردیا۔
غیر ملکی میڈیا کے مطابق کابل ایئر پورٹ پر ایک بار پھرفائرنگ سے افراتفری مچ گئی ، جس کے نتیجے میں ایک خاتون زخمی ہوئی ، جس کے بعد کابل ایئرپورٹ پر دوبارہ فلائٹ آپریشن بند کر دیا گیا۔
غیر ملکی میڈیا کا کہنا ہے کہ طالبان نے کابل ایئرپورٹ کو عارضی طور پر بند کرنے کا اعلان کرتے ہوئے جنگجووں کو کابل ایئرپورٹ کے اطراف میں تعینات کردیا ہے۔
گذشتہ روز کابل ایئر پورٹ پر افراتفری کے نتیجے میں پانچ افراد ہلاک ہو گئے تھے جبکہ سکیورٹی کی صورتحال کی وجہ سے پی آئی اے سمیت متعدد ایئر لائنز کا فضائی آپریشن متاثر ہوا تھا۔
بعد ازاں افغانستان کی سول ایوی ایشن نے نوٹم جاری کرتے ہوئے کہا تھا کہ کابل کی فضائی حدود کمرشل پروازوں کے لیے بند کر دی گئی، کابل انٹرنیشنل ایئر پورٹ کمرشل پروازوں کے لیے غیر معینہ مدت کے لیے بند کردیا گیا ہے ، کابل کی فضائی حدود صرف ملٹری جہازوں کے لیے کھلی رہے گی۔
