کابل: کابل ائیرپورٹ کے باہر بھگدڑ اور افراتفری سے سات افغان شہری جان سے ہاتھ دھو بیٹھے ہیں۔
برطانوی وزارت دفاع کی جانب سے جاری بیان کے مطابق صورتِ حال بہت پیچیدہ ہے، قابو پانے کے لیے پوری کوشش کر رہے ہیں،طالبان کے کنٹرول سنبھالنے کے ایک ہفتے بعد بھی افغان شہری پروازوں کے ذریعے ملک چھوڑنے کی کوششوں میں مصروف ہیں۔
میڈیا رپورٹ کے مطابق کابل میں حالات سے مایوس اور خوفزدہ لوگ بچوں اور خواتین کو باہر بھیجنا چاہتے ہیں ،گزشتہ روز پنٹاگون کے مطابق نو امریکی طیاروں نے تین ہزار سے زائد افراد کو افغانستان سے باہر نکالا تھا۔
برطانوی وزارت دفاع نے کابل ائیرپورٹ پر افراتفری اور بھگڈر کے نتیجے میں سات افراد کی ہلاکت کی تصدیق کرتے ہوئے کہا کہ ہماری ہمدردیاں اور دعائیں ان سات افغان خاندانوں کے لیے ہیں جنہوں نے بھگڈر کے دوران اپنے پیاروں کو کھودیا۔
دوسری جانب ائیرپورٹ پر صورتحال انتہائی خراب ہے تاہم سیکیورٹی صورتحال پر قابو پانے کے لیے پوری کوششیں کی جارہی ہیں۔
یہ بھی پڑھیں:افغانستان کی صورتحال، شیرخوار بچی کی ویڈیو نے دنیا کو ہلا کر رکھ دیا
واضح رہے کہ چند روز قبل بھی کابل کے حامد کرزئی انٹرنیشنل ائیرپورٹ پر امریکی فوج کی فائرنگ کے نتیجے میں پانچ افراد ہلاک ہوگئے تھے تاہم عالمی میڈیا کی جانب سے دعویٰ کیا گیا تھا کہ یہ افراد بھگدڑ مچنے کی وجہ سے ہلاک ہوئے۔
گذشتہ روز کابل ایئرپورٹ کے اندر جانے کی امید میں افغان والدین کی بچوں کو خاردار تاروں سے گزارنے کے مناظر نے دنیا کو ہلا کر رکھ دیا، چار ماہ کی بچی ہادیہ بھی فوجیوں کے ہاتھ لگی۔
ترک فوجیوں نے ننھی بچی ہادیہ رحمانی کو باحفاظت والدین تک پہنچایا جس کی تصویر اور ویڈیو وائرل ہورہی ہے۔
