کراچی: فیڈرل انویسٹی گیشن ایجنسی کے سائبر کرائم ونگ نے خاتون کے باتھ روم میں کیمرہ لگا کر ویڈیو بنانے والے ملزم کو گرفتار کرلیا۔
اے آر وائی نیوز کے مطابق ایف آئی اے سائبر کرائم ونگ نے اتوار کے روز دو مختلف کارروائیاں کیں، جس میں سے پہلی حیدرآباد میں کی گئی، جہاں سے ایک ملزم کو حراست میں لیا گیا۔
ایڈیشنل ڈائریکٹر کے مطابق ملزم نے خاتون کے باتھ روم میں خفیہ کیمرے لگا کر ویڈیو بنائی اور وہ اس کی بنیاد پر لڑکی کو بلیک میل کررہا تھا۔
خاتون نے اس سارے معاملے کے حوالے سے اپنے والد کو آگاہ کیا، جنہوں نے ایف آئی اے کو کارروائی کے لیے درخواست دی اور آج ملزم کو گرفتار کیا گیا۔ والد نے بتایا کہ ملزم نے مطالبہ پورا نہ ہونے پر جعلی آئی ڈی بنا کر ویڈیو وائرل کی تھی۔
ایف آئی اے کے مطابق گرفتار شخص کی شناخت حمزہ کے نام سے ہوئی، جس کے موبائل سے ویڈیوز برآمد ہوئیں ہیں۔
ایک اور کارروائی میں ایف آئی اے نے خاتون کو گرفتار کیا، جو اپنی رشتہ دار لڑکی کی ویڈیو وائرل کر رہی تھیں۔ ایف آئی اے کے مطابق متاثرہ لڑکی کے بہنوئی نےزیادتی کی کوشش کرتے وقت ویڈیوبنائی اور پھر یہ مذکورہ خاتون کو دے دی تھی۔
