یہ ایک ایسے شخص کی داستانِ حیات ہے جسے ہالی وڈ کی تاریخ کا لازوال اداکار اور ہر اعتبار سے ایک غیر معمولی انسان بھی کہا جاتا ہے۔ اس کا سبب ان کی انسان دوست طبیعت اور دردمندی ہے۔
ہم بات کررہے ہیں پال نیومین کی جنھوں نے 83 سال اس دنیا میں گزارے اور 2008ء میں آج ہی کے دن انتقال کرگئے۔ ایک اداکار کی حیثیت سے انھوں نے لازوال شہرت اور مقبولیت سمیٹی۔ انھیں کینسر کا موذی مرض لاحق تھا۔
ان کی نیلی آنکھیں انھیں منفرد بناتی تھیں۔ اس آسکرایوارڈ یافتہ اداکار نے ہالی وڈ کی فلموں ’دی ہسلر‘ ’کیٹ آن اے ہاٹ ٹِن رُوف‘ اور ’دی کلر آف منی‘ میں یادگار کردار ادا کیے اور اپنی پہچان بنائی۔
پال نیومین کا فلمی سفر پانچ دہائیوں پر محیط تھا۔ انھوں نے اس سفر میں ساٹھ فلموں میں کام کیا۔ وہ دس مرتبہ اکیڈمی ایوارڈ کے لیے نام زد ہوئے اور پہلی بار یہ ایوارڈ فلم ’دی کلر آف منی‘ میں ان کی بے مثال اداکاری پر حاصل کیا۔
پال نیومین 26 جنوری 1925ء کو کلیولینڈ اوہائیو میں پیدا ہوئے۔ ان کے والد کھیلوں کا سامان کی تجارت کرتے تھے۔ نیومین نے ابتدا میں نیوی میں ملازمت کرنا چاہی، لیکن نیلی آنکھوں والے نیومین اپنی جانچ کے دوران بعض رنگوں کی شناخت نہ کر سکے اور اس نقص کی بنا پر اس ملازمت سے محروم رہے۔
وہ ایک نہایت متحرک اور فعال شخص تھے جس نے اپنے شوق کو اہمیت دی انھوں نے 70 کی دہائی میں فلمی دنیا سے کچھ عرصہ کے لیے دوری اختیار کرلی تھی اور گاڑیوں کی ریسں کا شوق پورا کرنے لگے۔ بطور پیشہ ور ریس ڈرائیور انھوں نے ایک مقابلے میں دوسری پوزیشن حاصل کی۔
پال نیومین کو کل تین آسکر ایوارڈ ملے۔ فلم نگری میں ان کے مداحوں کی تعداد ان کی ہر فلم کے بعد بڑھتی رہی۔ جو این ووڈورڈ ان کی شریکِ سفر تھیں جو خود بھی ایک اداکارہ ہیں۔ اس جوڑے کے گھر پانچ بیٹیاں پیدا ہوئیں۔
نیلی آنکھوں والے پال نیومین نے ان بچّوں کے لیے ’سمر کیمپ‘ قائم کیے جو مہلک بیماریوں کا شکار تھے۔ وہ ایک دردمند انسان تھے اور انھوں نے جذبہ خدمت کے تحت کئی خیراتی اداروں کو مالی امداد بھی دی۔
