ماہرین صحت کا کہنا ہے کہ ہمارے مضبوط جوڑوں اور ہڈیوں کا انحصار صرف دودھ پر نہیں ہے بلکہ ہمارا بہتر طرز زندگی اور متعدد غذاؤں کا استعمال بھی ہڈیوں کی مضبوطی کیلئے لازمی امر ہے۔
اس حوالے سے اے آر وائی نیوز کے پروگرام باخبر سویرا میں آرتھوپیڈک سرجن ڈاکٹر ندیم آصف نے ایسی مختلف غذاؤں کے بارے میں بتایا جو ہڈیوں اور جوڑوں کے لیے بےحد مفید ہیں۔
انہوں نے بتایا کہ صحت مند زندگی کے لیے ہڈیوں اور جوڑوں کا مضبوط ہونا بہت ضروری ہے، ہڈیوں کی مضبوط نشونما کے لیے والدین کو چاہیے کہ اپنے بچوں کی غذا میں معدنیات کا جزو لازمی دیں جس میں دودھ انتہائی اہمیت کا حامل ہے۔
آرتھوپیڈک سرجن کے مطابق مضبوط ہڈیوں اور جوڑوں کے لیے ضروری ہے کہ آپ وٹامن ڈی اور کیلشیم سے بھرپور غذاؤں کو اپنی روزمرہ کی خوراک میں شامل کریں، ان غذاؤں میں قدرتی طور پر وٹامن ڈی اور کیلشیم موجود ہوتا ہے جو ہماری صحت کے لیے بہت ضروری ہیں۔
اس کے علاوہ وٹامن ڈی ہم سورج سے بھی حاصل کرسکتے ہیں اور اس کے علاوہ وٹامن ڈی اور کیلشیم والی غذائیوں میں دودھ، دہی، انڈے، مچھلی ، پنیر اور مشروم وغیرہ شامل ہیں۔
ڈاکٹر ندیم آصف کا کہنا تھا کہ ہڈیوں کی مظبوطی کیلئے سبز پتوں والی سبزیاں جیسے پالک اور ساگ وغیرہ کیلشیئم، اینٹی آکسائیڈنٹس اور وٹامن کے اور سی کے حصول کا اچھا ذریعہ ہے، ان سبزیوں کو اکثر کھانا ہڈیوں کو مضبوط بنانے کے ساتھ جسمانی مدافعتی نظام بھی طاقتورکرتا ہے۔
