ابوظبی: یو اے ای میں ٹریفک قوانین میں مزید سختی آ گئی ہے، ابوظبی میں سرخ سگنل کی خلاف ورزی پرگاڑی ضبط اور بھاری جرمانے کا سامنا ہو سکتا ہے۔
تفصیلات کے مطابق ابوظبی پولیس نے کار سواروں کو تنبیہ جاری کی ہے کہ وہ ٹریفک سگنل کی خلاف ورزی سے گریز کریں اور ڈرائیونگ کے دوران سڑک پر توجہ مرکوز رکھیں، بہ صورت دیگر اس کے عواقب برداشت کرنے ہوں گے۔
ابوظبی پولیس کا کہنا ہے کہ ٹریفک سگنل کی خلاف وزری پر مجموعی طور پر 51 ہزار درہم اور 12 ٹریفک پوائنٹس کا جرمانہ ہو سکتا ہے۔
امارات کی سرکاری خبر رساں ایجنسی وام کی رپورٹ میں ابوظبی پولیس کے حوالے سے کہا گیا ہے کہ گاڑیوں کی ضبطی سے متعلق قانون نمبر 5 برائے 2020 کے مطابق ایسی خلاف ورزی کے مرتکب افراد کو ایک ہزار درہم جرمانہ اور 12 بلیک پوائنٹس جاری کیے جائیں گے۔
اس قانون کے تحت جو کار سوار سرخ سگنل کی خلاف ورزی کریں گے ان کی گاڑی 30 دن کے لیے ضبط کر لی جائے گی اور انھیں گاڑی واپس حاصل کرنے کے لیے 50 ہزار درہم فیس ادا کرنا ہوگی۔
بیان کے مطابق اس جرم کے مرتکب شخص کا ڈرائیونگ لائسنس 6 ماہ معطل رہے گا اور عائد شدہ جرمانہ یک مُشت تین ماہ کے اندر جمع کرانا ہوگا، جرمانے کی ادائیگی میں ناکامی کی صورت میں ضبط شدہ گاڑی نیلام کر دی جائے گی۔
