ٹی20ورلڈ کپ کے میچ میں نیوزی لینڈ کے ہاتھوں افغانستان کی شکست کے بعد بھارت کی امیدیں بھی دم توڑ گئیں، اب بھارتی ٹیم آج اپنا طے شدہ میچ کھیل کر واپسی کا ٹکٹ کٹوالے گی۔
اس حوالے سے سابق بھارتی کرکٹر ہربھجن سنگھ نے افغانستان اور نیوزی لینڈ کے میچ میں بھارت کی فتح کی امید کرتے ہوئے کہا تھا کہ اب پاکستان کا سامنا بھارت سے ہوگا۔
تی ٹوئنٹی ورلڈکپ کے گروپ ٹو سے سیمی فائنل تک رسائی کے لیے جنگ اپنے اختتام کو پہنچی ان حالات میں بھارت کی افغانستان سے حیران کن جیت نے جہاں شائقین کرکٹ کو حیران کیا وہیں کچھ چیزوں پر میچ فکسنگ کی باتیں بھی ہوئیں۔
سوشل میڈیا پر میچ فکسنگ کے حوالے سے چلنے والی خبروں، تجزیوں اور میمز نے بھارتی شائقین کی خوشیوں کا مزہ کرکرا کردیا، جس کے جواب میں بھارتی کھلاڑی بھی میدان میں آگئے۔
سابق بھارتی کرکٹر ہربھجن سنگھ نے بھارت اور افغانستان کے میچ سے متعلق سوشل میڈیا پر فکسنگ کے الزامات لگانے والے پاکستانی شائقین پر برہمی کا اظہار کیا جس کا سوشل میڈیا پر خوب مذاق اڑایا جا رہا ہے ۔
ہربھجن سنگھ کا کہنا تھا کہ ہم اس بات کو تسلیم کرتے ہیں کہ پاکستان نے بہت اچھی کرکٹ کھیلی اور ہر کسی نے پاکستان کے کھیل اور بھارت کو شکست دینے پر ان کی تعریف کی۔
اپنی ایک ویڈیو میں ہربھجن سنگھ نے غصے کا اظہار کرتے ہوئے ناقدین کو سختی سے متنبہ کیا اور کہا کہ میں امید کرتا ہوں کہ بھارت آپ کو فائنل میں ملے گا۔
واضح رہے کہ دنیا میں سب سے بڑی ٹی ٹوئنٹی لیگ کا دعویٰ کرنے والا بھارت چوتھی مرتبہ ٹی ٹوئنٹی کے عالمی میلے میں سیمی فائنل میں پہنچنے سے قبل ہی باہر ہوگیا۔
پہلا ٹی ٹوئنٹی ورلڈکپ جیتنے والی بھارتی ٹیم اس کے بعد مسلسل تین مرتبہ پہلے راؤنڈ میں ہی باہر ہوگئی تھی، جبکہ 2014 میں رنر اپ رہی اور 2016 میں سیمی فائنل میں شکست سے دوچار ہوئی تھی۔
پانچ سال بعد ہونے والے ٹی ٹوئنٹی کے ورلڈکپ میں بھی بھارتی ٹیم کوئی اچھی پرفارمنس نہیں دے سکی اور سپر 12 کے راؤنڈ سے ہی باہر ہوگئی ہے۔
