ڈھاکا: پاکستان اور بنگلہ دیش کے درمیان ٹیسٹ سیریز سے قبل میزبان ٹیم کے اہم کھلاڑی سیریز سے باہر ہوگئے۔
تفصیلات کے مطابق پاکستان کے خلاف سیریز سے قبل بنگلہ دیش کے اوپنر تمیم اقبال انجری کا شکار ہوگئے جس کی وجہ سے وہ دو ٹیسٹ میچز پر مشتمل سیریز میں حصہ نہیں لے سکیں گے۔
تمیم اقبال کے انگوٹھے میں فریکچر ہوا جس کی تصدیق گزشتہ روز ایکسرے کیے جانے کے بعد ہوئی۔
واضح رہے کہ تمیم اقبال کے الٹے ہاتھ کے انگوٹھے میں فریکچر گزشتہ ماہ کھٹمنڈو میں ہونے والے ٹی 20 میچ کے دوران ہوا تھا۔
بنگلہ دیشی اوپنر کا کہنا ہے کہ ان کے انگوٹھے کا فریکچر تقریباً ٹھیک لگ رہا تھا لیکن سوجن برقرار تھی جس پر ایک اور ایکسرے کرایا تو فریکچر موجود ہونے کا پتا چلا۔
تمیم اقبال کا کہنا تھا کہ وہ اپنے انگوٹھے کو ٹھیک سے حرکت نہیں دے پارہے اور انجری سے نجات پانے میں کچھ وقت درکار ہے۔
یاد رہے کہ پاکستان اور بنگلہ دیش کے درمیان پہلا ٹیسٹ 26 نومبر اور دوسرا 4 دسمبر کو کھیلا جائے گا۔
