چٹاگانگ ٹیسٹ میں شاہینوں کا پلٹ کر وار، پہلی اننگز میں خسارے میں جانے کےبعد دوسری اننگز میں بنگلادیش کے ٹاپ آرڈر کو پویلین لوٹا دیا۔
بنگلادیشی بولرز نے عمدہ بولنگ کرتے ہوئے پاکستان کی پوری ٹیم کو 286 رنز پر ڈھیر کر دیا، عبداللہ شفیق گذشتہ روز کے اسکور میں اضافہ کئے بغیر آج کھیل کے پہلے ہی اوور میں چلتے بنے، تجربہ کار اظہر علی کھاتہ کھولے بغیر ہی پویلین لوٹ گئے، کپتان بابر اعظم 10 رنز بناکر مہدی حسن کے ہاتھوں کلین بولڈ ہوئے۔
تجربہ کار مڈل آرڈر بیٹر فواد عالم کی مزاحمت 8 رنز پر جواب دے گئی اور وہ تیج السلام کا شکار بنے، محمد رضوان کو عبادت حسین نے ایل بی ڈبلیو کیا وہ بھی صرف 5 رنز بناسکے،حسن علی 12 رنز بناکر غیر ضروری شارٹ کھیلتے ہوئے آؤٹ ہوئے۔
پاکستان کی جانب سے عابد علی 113،عبدللہ شفیق52 اور فہیم اشرف نے38رنز اسکور کیے، واضح رہے کہ چٹاکانگ ٹیسٹ کی پہلی اننگز میں میزبان بنگلا دیش 330 رنز بنا کر آؤٹ ہوگئی تھی۔
میزبان ٹیم نے دوسری اننگز کا آغاز 44 رنز کی برتری کے ساتھ کیا لیکن حریف بلےباز بھی حسن اور شاہین کے وار سے نہ بچ سکے، بنگلادیش کے 4 کھلاڑی صرف 25 رنز پر پویلین لوٹ گئے۔
شاہین شاہ آفریدی نے 3 اور حسن علی نے ایک وکٹ حاصل کی، تیسرےروز کے اختتام تک بنگلادیش نے چار وکٹوں پر39 رنز بنائے اور 83 رنز کی برتری حاصل کر لی۔
