مسقط : خلیجی سلطنت عمان میں افرادی قوت کی کمی کو پورا کرنے کے لیے ملازمین کی تعداد بڑھانے کیلئے اقدامات کیے جارہے ہیں۔
اس حوالے سے عمانی ذرائع ابلاغ کا کہنا ہے کہ پرائیویٹ سیکٹر میں مزید ملازمتیں فراہم کرنے کا عندیہ دیا گیا ہے، نجی شعبے میں عمانی افراد کے لیے ملازمت کے300 نئے مواقع متعارف کرائے گئے ہیں۔
عمان کی وزارت محنت نے مزدوروں کی ترقی وخوشحالی کیلیے نجی شعبے میں ملازمتوں کے مواقع پیدا کرنے کی عمل کی حمایت کا اعلان کیا ہے۔
عمان نیوز ایجنسی نے اپنی رپورٹ میں بتایا ہے کہ وزارت محنت نے ملازمت کے خواہشمند افراد کے لیے342 ملازمتوں کے مواقع کا اعلان کیا ہے جو وزارت کے نئے اقدام میں شامل ہیں۔
ملازمتوں کو مختلف شعبوں اور قابلیتوں میں تقسیم کیا گیا ہے جن میں یونیورسٹی کی اہلیت کے لیے122، پوسٹ سیکنڈری ڈپلومہ ہولڈرز کے لیے100 اور جنرل ڈپلومہ ہولڈرز کے لیے120 شامل ہیں۔
یاد رہے کہ خلیجی سلطنت عمان نے کمپنیوں کے لیے غیرملکیوں کو بھرتی کرنے کے لائسنس کی رعایتی مدت میں بھی توسیع کردی ہے۔
عمان کی وزارت محنت کی جانب سے غیرملکیوں کو بھرتی کرنے کے لائسنس کی رعایتی مدت میں توسیع کی گئی ہے جس کے تحت بیرون ملک سے افرادی قوت بھرتی کرنے کی اجازت دینے کے لائسنس کی مدت جو کہ 30ستمبر 2021 کو ختم ہو رہی تھی اس کو بڑھا کر اب 31 دسمبر 2021 تک کردیا گیا ہے۔
