کراچی میں ڈاکو کیش وین سے ڈیڑھ کروڑ سے زائد رقم لوٹ کر فرار ہوگئے۔
اے آر وائی نیوز کے مطابق کراچی کے علاقے ناظم آباد میں دو ملزمان کیش وین سے ڈیڑھ کروڑ روپے سے زائد رقم لوٹ کر فرار ہوگئے، بینک کے اوقات کار ختم ہونے کے بعد رقم منتقل کی جارہی تھی۔
ڈکیتی کی واردات شام 7 بجے کے قریب رپورٹ ہوئی، واردات کی سی سی ٹی وی فوٹیج منظرعام پر آگئی۔
پولیس کا بتانا ہے کہ نجی بینک میں رقم کے تین تھیلے منتقل کیے جارہے تھے، تھیلوں میں تین کروڑ سے زائد رقم موجود تھی، ملزمان نے کیش وین سے بینک رقم منتقل کرنے کے دوران فائرنگ کی۔
پولیس کے مطابق ڈاکوؤں کی فائرنگ سے سیکیورٹی گارڈ زخمی ہوا، ملزمان اسی گارڈ سے رقم کا تھیلا چھین کر فرار ہوگئے۔
پولیس حکام کا کہنا ہے کہ فائرنگ ہوتے ہی دوسرا گارڈ بینک کے اندر بھاگا اور اس نے بڑی رقم بچالی، سی سی ٹی وی فوٹیج کی مدد سے واقعے کی تحقیقات کا آغاز کردیا گیا ہے۔
یاد رہے کہ چند ماہ قبل کراچی کے علاقے تیموریہ میں بھی کیش وین لوٹ لی گئی تھی۔
